जागतिक तंबाखूविरोधी दिन : जगात दरवर्षी ३० लाख नागरिकांचा होतो मृत्यूतळेगाव दशासर : गुटका, तंबाखू खाणे, बीडी, सिगारेट ओढणे हे आरोग्यास अतिशय हानीकारक आहे. तंबाखू वापराच्या दुष्परिणामाबाबत जनजागृती करून या व्यसनापासून लोकांना, शाळा-महाविद्यालयातील तरूण-तरूणींना परावृत्त करणे हा या ३१ मे जागतिक तंबाखू विरोधी दिन म्हणून पाळला जातो. तंबाखूचा उपयोग आज जगाच्या कानाकोपऱ्यात पसरलेला आहे. याला तंबाखू उद्रेक म्हणजे वावगे ठरणार नाही. इतर आजाराच्या उद्रेकाचे मूळ कारण हे सामान्यपणे एखादा जीवाणू किंवा विषाणू असे असते. परंतु तंबाखू उद्रेकाचे कारण जिवाणू किंवा नैसर्गिक आपत्तीपैकी काही नसून ते मानव निर्मित आहे. नफ्याच्या शोधात असलेल्या तंबाखुजन्य उत्पादन निर्मितीच्या कंपन्या त्यांचे ग्राहक क्षेत्र वाढविण्याच्या प्रयत्नात असतात. परंपरागत ग्राहकासोबतच तरूण पिढीला चटक लावतात आणि स्त्रियांनी सांस्कृतिक गुलामगिरी झुगारून धुम्रपानास उद्युक्त व्हावे अशा प्रकारच्या भावनात्मक जाहीरातबाजीने स्वत:च्या फायद्यासाठी त्यांना खोटी प्रलोभने दाखवून आकर्षित करतात. इतर साथरोगाप्रमाणे हा उद्रेक नव्हे तर धुम्रपान किंवा तंबाखू सेवन करण्यास लोकांनी सुरुवात केल्यानंतर प्रदीर्घ काळांनी दिसणारी ती एक प्रतिक्रिया असते. अंदाजे ३० ते ४० वर्षानंतर त्याचे दुष्परिणाम मृत्यूच्या स्वरुपात दिसू लागतात. आज जगामध्ये प्रत्येक वर्षी ३० लाख मृत्यू हे तंबाखुजन्य पदार्थाच्या उपयोगाने होतात, यामुळे कोट्यवधी लोक बळी ठरतील, ठरू शकतात.१९४० ते १९५० या दशकात धुम्रपानाने थैमान घातले होते. त्याचे परिणाम आज दिसू लागले आहेत. विकसीत देशात आढळणाऱ्या वर्षातील एकूण मृत्यूपैकी २० टक्के मृत्यू हे तंबाखूच्या वापरामुळे झालेले आज आढळत आहेत. आपण याला नियंत्रित करू शकलो नाही तर हे प्रकरण ३० ते ४० वर्षात एक कोटीवर जाईल की ज्यावेळी धुम्रपान करणारे सध्याचे तरूण हे मध्यमवयात असतील आणि त्यापैकी ७० टक्के मृत्यू विकसनशील राष्ट्रातील असतील म्हणून चालू दशकात यासंबंधी गंभीरपणे प्रतिबंधक उपाय योजले नाही तर अनेक लोक निष्कारण मरतील. संशोधकांनी क्रमवारी ठरविल्याप्रमाणे असे सिद्ध होते की, तंबाखुमधील निकोटीन हे हिराईन कोकेन, मॅरिज्युआना किंवा अल्कोहोल यापेक्षाही हानीकारक आहे. तरी सुद्धा तंबाखू उत्पादक कंपन्यांनी तंबाखूची उत्पादने भारी प्रमाणात बाजारात आणणे चालूच ठेवले आहे. परिणामी जागतिक तंबाखू सेवन हे दुप्पट झाले आहे आणि हे प्रमाण जगाच्या काही भागात वाढतच आहे. सेवन करण्याची सुरक्षित अशी पातळी तंबाखू निर्मित उत्पादकांना नाही आणि हेच एक वैधानिक असे ग्राहकोपयोगी उत्पादन आहे की जे उत्पाकांच्या अपेक्षेप्रमाणे उपयोग करून ग्राहकाला ठार मारते. अनेक राष्ट्रात स्त्रियांमधील धुम्रपानाचे प्रमाण वाढतच आहे, ग्राहकांना परवडेल अशी कमी किंमत व जाहीरातबाजीद्वारे तंबाखू कंपन्यांनी तरूण पिढीला प्रोत्साहीत करण्यात यश मिळविले आहे. या वयातील मुले-मुली धुम्रपानाच्या दूरगामी परिणामाबद्दल बेफिकीर असतात म्हणून धुम्रपानाच्या दूरगामी दुष्परिणामास सुरुवात होते. जागतिक आरोग्य संघटनेचे असे अनुमान आहे की आज जगात ११० कोटी लोक धुम्रपानाच्या आहारी गेलेले आहेत.
तंबाखूजन्य पदार्थांबाबत व्हावी व्यापक जनजागृती
By admin | Updated: May 31, 2015 00:03 IST