चिखलदरा (अमरावती) : कोरोना व्हायरसची खबरदारी म्हणून मेळघाटातील कुपोषित व सर्वसाधारण श्रेणीतील सर्वच बालकांसह गर्भवती व स्तनदा मातांना दिल्या जाणारा पूरक पोषण व अमृत आहार १६ मार्चपासून बंद आहे.
अंगणवाडी केंद्रांना टाळे लागल्याने नेहमीप्रमाणे आहारासाठी जाणारे आदिवासी बालक रित्या पावलांनी घरी परत येत असल्याचे चित्र आहे. दुसरीकडे शहरी व ग्रामीण भागात बालकांना घरपोच आहार देण्याचे शासनाचे आदेश आहेत.
मेळघाटच्या धारणी व चिखलदरा तालुक्यातील सहा महिने ते सहा वर्षांआतील ३३ हजार बालकांसह ४ हजार स्तनदा व १५०० गर्भवती मातांचा आहार पूर्णत: बंद आहे. शासनाने शहरी व ग्रामीण भागातील अंगणवाडी केंद्रासाठी १८ मार्च रोजी परिपत्रक काढले. त्यामध्ये अंगणवाड्यांमध्ये लाभार्थ्यांना कोरोना विषाणूचा प्रादुर्भाव होऊ नये, म्हणून प्रतिबंधक उपाययोजना करण्याच्या अनुषंगाने नागरी व ग्रामीण भागातील अंगणवाडी केंद्रात सहा ते तीन वर्षे वयातील बालकांना ताजा व गरम आहार देण्याऐवजी घरपोच आहार देण्याचे आदेश दिल्याने त्या अंगणवाडी केंद्रांतील बालकांच्या घरी जाऊन आहार दिला जात आहे.
परंतु मेळघाटातील अंगणवाडी केंद्रांना १६ मार्चपासून टाळे लागले आहे. परिणामी गर्भवती स्तनदा व कुपोषित बालक आहारापासून वंचित आहेत.