अमरावती: जिल्हा परिषदेच्या नुकत्याच पार पडलेल्या स्थायी समितीच्या निर्णयानुसार सीईओंकडे प्राप्त झालेल्या तक्रारीनुसार चौकशी आदेशातील सदस्यांचा उल्लेख असलेला मजकूर वगळून आता मेळघाटातील धारणी व चिखलदरा तालुक्यातील १८ ग्रामपंचायतींची चौकशी करण्यासाठी सात विस्तार अधिकाऱ्यांची नियुक्ती करण्यात आली आहे. याबाबत सुधारित आदेश मुख्य कार्यकारी अधिकाऱ्यांनी काढला आहे.
धारणी व चिखलदरा या दोन तालुक्यांतील काही ग्रामपंचायतींनी केलेल्या विकासकामांत अनियमितता झाल्याची तक्रार गत सप्टेंबर महिन्यात प्राप्त झाली होती. या तक्रारींच्या अनुषंगाने सीईओंनी २८ डिसेंबर रोजी तक्रार असलेल्या ग्रामपंचायतींची चौकशी करण्याचे आदेश काढले होते. मात्र, या आदेश तक्रारीतील संदर्भ देत झेडपी सदस्यांचा उल्लेख करण्यात आला होता. यावर मेळघाटातील नऊ सदस्यांनी आक्षेप घेतला होता. त्यामुळे स्थायी समितीत मेळघाटातील सदस्य संतापले होते. अखेर आक्षेप असलेला मजकूर काढून नव्याने ग्रामपंचायतींच्या चौकशीसाठी सुधारित आदेश काढण्याचे मुख्य कार्यकारी अधिकाऱ्यांनी आश्वासन दिले होते. त्यानुसार पदाधिकारी व सदस्यांच्या सूचनेप्रमाणे नवीन चौकशी समितीचा गठित करून सुधारित आदेश काढून आता तक्रार असलेल्या ग्रामपंचायतींची पहिल्या टप्प्याची सात विस्तार अधिकारी चौकशी करणार आहेत. यात चिखलदरा तालुक्यातील सहा ग्रामपंचायतीसाठी तीन आणि धारणी तालुक्यातील १३ ग्रामंचायतींची चौकशी चार विस्तार अधिकारी करणार आहेत.
बॉक्स
चौकशी अधिकारी व ग्रामपंचायती या प्रमाणे
मोर्शी पंचायत समितीचे विस्तार अधिकारी एस.एस. भिवगडे हे माखला, भुलोरी, वरूडचे आर.एन. कांबळे हे रायपूर, सेमाडोह, तिवस्याचे ए.आर. रामटेके हे लवादा आणि खडीमल, दर्यापूरचे ए.एन. कुलकर्णी हे कुटंगा, चौराकुंड, बोबदो, अमरावतीचे जे.एच. देशमुख हे दिया, सालई, गोंडवाडी, चांदूर रेल्वेचे एच.जे. चव्हाण हे झापल, बिजुधावडी, गोलाई, गोंडवाडी आणि अंजनगाव सुनील गवई हे बेरदा बल्ङा,साद्राबाडी व टिटंबा ग्रामपंचायतीमधील कामाची चौकशी करणार आहेत.
कोट
स्थायी समितीत पदाधिकाऱ्यांनी केलेल्या सूचनेप्रमाणे यापूर्वीचा चौकशी समितीचा आदेशामधील आक्षेप असलेला संदर्भ वगळून नवीन सुधारित आदेश काढलेला आहे. यामध्ये पहिल्या टप्प्यात मेळघाटातील ग्रामपंचायतींची चौकशी विस्तार अधिकारी यांच्यामार्फत केली जाणार आहे. यासंदर्भात अहवाल आल्यानंतर कारवाईबाबत योग्य निर्णय घेतला जाईल.
- अमोल येडगे, मुख्य कार्यकारी अधिकारी