ग्रामपंचायत सदस्यांच्या वडिलांना जातिवाचक शिवीगाळ

धारणी : तालुक्यातील झापल ग्रामपंचायतमध्ये १६ फेब्रुवारी रोजी सरपंचपदाची निवडणूक प्रस्तावित होती. ती होण्यापूर्वी गावातील विशिष्ट समाजातील नागरिकाने एका महिला सदस्याच्या वडिलांना जातिवाचक शिवीगाळ केली. त्यामुळे पोलीस बंदोबस्तात निवडणूक घेण्यात आली.

तालुक्यातील झापल ही गटग्रामपंचायत असून, त्यात शेजारच्या बारू, जुतपाणी, टोली या गावांचा समावेश आहे. तेथे मंगळवारी सरपंचपदाची निवडणूक होती. झापल गावातीलच साजिद खा गुडे खा याच्या नेतृत्वातील पॅनेल ग्रामपंचायतीवर निवडून आले आहे. त्याच्या पॅनलमधील माणकू जावरकर या महिला सदस्याला तो सरपंच बनविणार होता. यादरम्यान रविवारी सायंकाळी ७ वाजता तो गावातीलच अविरोध निवडून आलेल्या विरोधी पक्षाच्या महिला सदस्याच्या घरी गेला. तेथे त्या महिला सदस्याआ माणकू जावरकरलाच मतदान कर, असे धमकावले. त्यावर तिने योग्य निर्णय घेईन, असे बजावले. त्याने त्या महिला सदस्याला शिवीगाळ केली तसेच तिच्या वडिलांनासुद्धा जातिवाचक शिवीगाळ करून मारहाण केली, अशी तक्रार सदस्याच्या पित्याने धारणी पोलिसांत रविवारी रात्री तक्रार नोंदविली. त्यांच्या तक्रारीवरून साजिद खा गुडे खा याच्याविरुद्ध धारणी पोलिसांनी कलम ३२४, २९४ व अ‍ॅट्रासिटी अन्वये गुन्हा दाखल केला. या घटनेनंतर मंगळवारी पोलीस निरीक्षक विलास कुलकर्णी यांनी चोख पोलीस बंदोबस्त ठेवला होता.