-------
सावळी येथे वीज तंत्रज्ञाला शिवीगाळ
ब्राह्मणवाडा थडी : नजीकच्या सावळी खुर्द येथे वीज तंत्रज्ञाला बिल भरत असल्याचे सांगून बोलावल्यानंतर शिवीगाळ करण्यात आली. कॉलर पकडली तसेच काठी उगारण्यात आली. याप्रकरणी आसेगावपूर्णा पोलिसांनी भादंविचे कलम ३५३, २९४ अन्वये बाबूराव गुलाबराव तायडे (४०) याच्याविरुद्ध गुन्हा नोंदवला. तंत्रज्ञ प्रवीण छापाने (२९) यांनी पोलिसांत फिर्याद दिली.
------
मंगरूळ चव्हाळा येथे घरफोडी
मंगरूळ चव्हाळा : वाढोणा रामनाथ येथे राहुल पांडुरंग आखरे (३१) यांच्या घरी २ मार्च रोजी चोरी झाली. ते गोलवाडी (जि. वाशीम) येथे नातेवाइकाकडे लग्नाला गेले होते. चोरट्यांनी कपाटातील १२.५ ग्रॅमचा नेकलेस, आठ ग्रॅमच्या तीन अंगठ्या, चार ग्रॅमची कर्णफुले, गहू विक्रीतून मिळालेले रोख ४५ हजार रुपये चोरून नेले. मंगरूळ चव्हाळा पोलिसांनी गुन्हा नोंदविला.
--------
लाल्याचे पैसे देत नसल्याने भावाला मारहाण
मंगरूळ दस्तगीर : नजीकच्या बोरगाव धांदे येथील अविनाश विंचूरकर (३५) यांनी वडिलोपार्जित जमिनीवरील पिकाच्या लाल्याच्या नुकसानभरपाईसाठी मिळालेले पैसे देण्यास नकार दिला. त्यावरून भाऊ प्रवीण (४०) व त्याचा मुलगा प्रीतम (२५) यांनी अनुक्रमे काठी व कुऱ्हाडीने मारले. मंगरूळ दस्तगीर पोलिसांनी भादंविचे कलम ३२४, ४४७, ३४ अन्वये दोघांविरुद्ध गुन्हा दाखल केला.
---------
फुबगाव येथे महिलेला मारहाण
बेलोरा : चांदूर बाजार तालुक्यातील फुबगाव येथे ४५ वर्षीय महिलेला सागर जयकिसन गवई, अक्षय मनोहरे व दोन महिलांनी मारहाण केली. बकरीचे खत अंगणात का सांडवले, असे म्हटल्यावरून मारहाण करण्यात आली.
------------
रेतीची चोरटी वाहतूक पकडली
चांदूर बाजार : तालुक्यातील फुबगाव ते चांदूर बाजार मार्गावर रेतीची चोरटी वाहतूक करणारा विनाक्रमांकाचा ट्रॅक्टर पकडला. पोलिसांनी याप्रकरणी चालक नितीन ज्ञानेश्वर किटुकले (२७, रा. फुबगाव) याच्याविरुद्ध २ मार्च रोजी गुन्हा नोंदविला.
------------
चिंचोली येथे महिलेला मारहाण
शेंदूरजनाघाट : ब्राह्मणवाडा थडी पोलीस ठाण्याच्या हद्दीत चिंचोली येथे २८ वर्षीय महिलेला २ मार्च रोजी सकाळी कमलकिशोर रामदास काळे (३५) व त्याच्या पत्नीने शिवीगाळ केली व मारहाण केली. पोलिसांनी दोघांविरुद्ध भादंविचे कलम ३२४, ५०४, ५०६, ३४ अन्वये गुन्हा दाखल केला.
-----------
ब्राह्मणवाडा थडी येथे महिलेचा विनयभंग
ब्राह्मणवाडा थडी : स्थानिक २२ वर्षीय विवाहितेचे खुल्या जागेत बांधण्यात येत असलेल्या घराची भिंत केतन लाड (३२) व अविनाश बदुकले हे पाडत होते. तिने हटकल्यावर अविनाशने डोक्याचे केस पकडून विनयभंग केला. याप्रकरणी ब्राह्मणवाडा पोलिसांनी भादंविचे कलम ३५४ (अ), ५०६ अन्वये गुन्हा दाखल केला.