अमरावती : दिल्लीवरून बैतूलमार्गे परतवाड्याकडे येत असलेला १६ लाख ९५ हजार रुपये किमतीचा प्रतिबंधित गुटखा असलेले पन्नास पोते वाहून आणणारा १४ चाकी ट्रक पोलिसांनी पकडला. आरजे ११ जीबी ८५९३ क्रमांकाच्या ट्रकसह एकूण ४१ लाख ९५ हजारांचा मुद्देमाल पोलिसांनी जप्त केला.
गोपनीय माहितीच्या आधारे, अचलपूरचे उपविभागीय पोलीस अधिकारी तथा परीविक्षाधीन अधिकारी गौहर हसन यांनी ही कारवाई केली. यादरम्यान त्यांना पोलीस कॉन्स्टेबल शेख गणी व विराज ठाकूर यांनी सहकार्य केले. मंगळवारी मध्यरात्रीनंतर दीड वाजताच्या सुमारास बैतूल-परतवाडा मार्गावरील बैतूल नाक्यासमोरील स्मशानघाटालगत हा ट्रक ताब्यात घेतला.
परतवाडा पोलीस ठाण्याच्या आवारात ट्रक लावल्यानंतर झडती घेतली असता त्यात ''वाह'' नामक गुटख्याचे पन्नास पोती आढळून आली. ही पोती ट्रकच्या मधोमध ठेवून त्याच्या आजूबाजूला व वर इलेक्ट्रॉनिक्स वस्तूंचे बॉक्स ठेवण्यात आले होते. यामुळे या पोत्यांचा अंदाज येणेही शक्य नव्हते. पायलटिंग करणारी कार (एमएच ४३ डी ८३४४) ट्रकच्या पुढे मार्गस्थ होती. ही बाब लक्षात येताच आयपीएस गौहर हसन यांनी ही कारही परतवाडा पोलीस ठाण्यात उभी केली. या कारमधून प्रवास करणाऱ्या अचलपूर येथील तीन व्यक्तींना रात्रभर पोलीस स्टेशनला डिटेन करून ठेवण्यात आले.
चालक ताब्यात
ट्रकचालक रामभरण धाकड व क्लीनरला पोलिसांनी ताब्यात घेतले आहे. पकडलेल्या प्रतिबंधित गुटख्याची माहिती अन्न व औषध प्रशासनाला दिली आहे. अन्न व औषध प्रशासन विभागाच्या अधिकाऱ्यांच्या तक्रारीवरून विविध कलमांन्वये गुन्हे दाखल करण्यात आले आहेत.
गुटख्याची खेप अमरावतीला?
ट्रकचालकाच्या सांगण्यानुसार, हा गुटखा अकोल्याकडे जात होता. या पोत्यांमध्ये प्रतिबंधित गुटखा असल्याची माहिती नव्हती, तर सुगंधी पदार्थ असल्याचे ट्रक भरताना सांगितले गेल्याचे तो म्हणाला. काहींच्या मते हा गुटखा अमरावतीला उतरविला जाणार होता. पुढील तपास परतवाडा ठाणेदार संतोष ताले व त्यांचे सहकारी करीत आहेत.