अमरावती : अमरावती येथील नवाथे नगरातील रहिवासी विनोद कपिले यांची अखिल भारतीय विद्यापीठ संघाच्या निरीक्षकपदी नुकतीच नियुक्ती करण्यात आली आहे. अखिल भारतीय विद्यापीठ महासंघाच्या सहसचिव युवा कल्याण व खेळ विभागद्वारा ही नियुक्ती केलेली असून, कपिले यांच्याकडे पूर्व विभागाचा प्रभार सोपविण्यात आला आहे.
पूर्व विभागीय आंतर विद्यापीठीय क्रिकेट पुरूष स्पर्धा २४ डिसेंबर ते १४ जानेवारी २०२० या कालावधीत रावेनशा विद्यापीठ कटक, ओडिशा येथे आयोजित करण्यात आलेली आहे. या स्पर्धेतून भारतीय क्रिकेट नियामक मंडळ व अखिल भारतीय विद्यापीठ संघ यांच्या संयुक्त विद्यमाने आयोजित विसी ट्रॉफीसाठी भारतीय क्रिकेट नियामक मंडळद्वारा नियुक्त दोन सदस्य व विनोद कपिले यांच्या निरीक्षणात पूर्व विभागाचा संघ निवडण्यात येईल.
विनोद कपिले हे मूर्तिजापूर येथील डॉ.आर.जी.राठोड कला व विज्ञान महाविद्यालय येथे संचालक शारीरिक शिक्षण व खेळ विभाग या पदावर कार्यरत आहेत. ते स्वत: प्रथमश्रेणी क्रिकेटपटू आहेत. त्यांनी विविध स्तरावर विदर्भ व महाराष्ट्र संघातून प्रतिनिधित्व केले.