अमरावती : शहराच्या विविध भागातून दुचाकी चोरणाऱ्या चार सराईत चोरांना गुन्हे शाखेच्या युनिट दोनने रविवारी अटक केली. त्यांच्याकडून चोरीच्या ११ दुचाकी जप्त करण्यात आल्यात. हेमंत राजेश चिलवंते (२३, रा. पाचबंगला, बडनेरा), प्रदीप विजय बांगर (१९, रा. अंबिकानगर, अकोला), रोशन राजू गावंडे (२४, रा. पाचबंगला, बडनेरा) व अमित नरेश ग्वालानी (३४, रा. सिंधी कॅम्प, बडनेरा) अशी अटक आरोपींची नावे आहेत.
गुन्हे शाखेच्या युनिट दोनचे पथक राजापेठ ठाण्यात दाखल दुचाकी चोरीच्या एका गुन्ह्याचा समांतर तपास करीत होते. तपासात त्या गुन्ह्यात हेमंत, प्रदीप, रोशन व अमित या चौघांचा हात असल्याचे समोर आले. त्यानुसार त्यांना अटक करण्यात आली. चौकशीत त्यांनी राजापेठच्या गुन्ह्याची कबुली दिली. सोबतच आणखी काही दुचाकी चोरी केल्याची माहितीही दिली. त्यानुसार त्यांच्याकडून शहरातील विविध भागांतून चोरलेल्या ४ लाख १७ हजार रुपयांच्या तब्बल ११ दुचाकी जप्त करण्यात आल्यात. ही कारवाई गुन्हे शाखा युनिट दोनचे पोलीस निरीक्षक राहुल आठवले यांच्या नेतृत्वात सहाय्यक पोलीस निरीक्षक महेशकुमार इंगोले व सत्यवान भुयारकर, पोलीस उपनिरीक्षक संजय वानखडे, सहाय्यक पोलीस उपनिरीक्षक राजेंद्र काळे, जावेद अहेमद, गजानन ढेवले, दीपक सुंदरकर, संग्राम भोजने, मंगेश शिंदे, चंद्रशेखर रामटेके, चेतन कराडे, योगेश पवार, राजीक रायलीवाले, संदीप खंडारे, प्रतीक यादव यांनी केली.