अमरावती : इन्स्टाग्रामवर झालेली ओळख एका अल्पवयीन मुलीचे सर्वस्व हिरावून गेली. मूळच्या परभणी येथील असलेल्या त्या अल्पवयीन मुलीवर हिंगोली बायपास व अमरावतीमधील एका हॉटेलमध्ये अतिप्रसंग करण्यात आला. तिलाच अमरावतीच्या त्या हॉटेलमध्ये सोडून तो एकटाच रफुचक्कर झाला. याप्रकरणी पीडितेच्या तक्रारीवरून शहर कोतवाली पोलिसांनी आरोपी अशफाक पठाण अहमद खान (रा. हिंगोली) याच्याविरुद्ध भादंविचे कलम ३७६ (२), ४१७, व पोस्कोअन्वये गुन्हा दाखल केला.
तक्रारीनुसार, पीडितेची सुमारे वर्षभरापूर्वी आरोपीशी इन्स्टाग्रामवर ओळख झाली. आरोपीने चॅटिंग करून फिर्यादीशी प्रेमसंबंध प्रस्थापित केले. १९ फेब्रुवारी २०२१ रोजी आरोपी हा त्याच्या एम एच ३८ व्ही ९२७४ या चारचाकी वाहनाने फिर्यादीच्या राहते घरी परभणी येथे पोहोचला. मी तुझ्यावर खूप प्रेम करतो, मला तुझ्याशी लग्न करायचे आहे, असे म्हणून तिला कारमध्ये बसवून हिंगोली येथे वाशिम बायपास रोडलगत निर्जनस्थळी घेऊन गेला. तेथे ‘मैं तुझसे बहोत प्यार करता हूँ, मै तुझसे शादी करुंगा, मुझे तुझसे बच्चा होना, असे म्हणून त्याने वाहनातच तिच्यावर अतिप्रसंग केला. तिला कारने न सोडता त्याने तेथेच तिच्याशी वाद घातला. तिला परभणीच्या एसटीत बसून दिले. त्यानंतरही फोनवरुन सतत लग्नाचे आमिष दाखवून तिला वाशिम बायपासवर नेऊन तिच्याशी जबरीने शारीरिक संबंध प्रस्थापित केले. लग्नास नकार देऊन त्याने आपला विश्वासघात केल्याचे पीडितेने तक्रारीत म्हटले आहे.