पथ्रोट (अमरावती) : अंजनगाव सुर्जी ते परतवाडा मार्गावरील जवळापूर फाट्यानजीक बुधवारी रात्री ८ वाजता दुचाकी व विनाक्रमांकाच्या जीपमध्ये झालेल्या धडकेत दुचाकी चालक ठार झाला, तर दोघे जखमी झाले. तिघेही पथ्रोट येथील रहिवासी आहेत.
भाऊबीजेनिमित्त दोघे मावसभाऊ मित्रासह पथ्रोट येथून अंजनगावला कपडे घेण्याकरिता दुचाकीने जात होते, तर विना क्रमांकाची जीप अंजनगावकडून परतवाडाकडे येत होती. या जीपला दुचाकीने जबर धडक दिली. यात कुलदीप आसोले व आयुष बोरकर हे गंभीर जखमी झाले, तर सूरज चिठोरे किरकोळ जखमी झाला. घटनेची माहिती मिळताच, पथ्रोट पोलिसांसह नागरिकांनी रुग्णवाहिका बोलावून जखमींना तत्काळ अचलपूर उपजिल्हा रुग्णालयात दाखल केले. तेथे उपचारादरम्यान कुलदीपचा मृत्यू झाला. गंभीर जखमी आयुषवर खासगी रुग्णालयात उपचार सुरू आहेत. शवविच्छेदनानंतर शोकाकुल वातावरणात गुरुवारी कुलदीपवर अंत्यसंस्कार करण्यात आले. आईचा एकुलता एक कुलदीप अखेर विझला.
जीप अमरावती येथील व्यक्तीची असून सातेगाव येथील चालक होता. त्यातील महिला व मुलीही जखमी झाल्या. चालक पसार झाल्याचे पोलिसांनी सांगितले.
ओवाळणीचे स्वप्न भंगले
भाऊबीजेनिमित्त अकोला येथून आलेली मावसबहीण कुलदीपला ओवाळणी घालणार होती. त्याचा एक भाग म्हणून तो अंजनगावला निघाला होता. लवकर येतो, असे त्याने सर्वांना सांगितले. मात्र, त्याचे कलेवरच घरी आले.