अमरावती : एका १५ वर्षे ९ महिने वयाच्या शाळकरी मुलीला लग्नाचे आमिष दाखवून तिला प्रेमजाळ्यात ओढण्यात आले. पुढे तिच्यावर शारीरिक अत्याचार करण्यात आला. त्यातून तिला गर्भधारणा झाल्याची धक्कादायक बाब येथील खोलापुरी गेट पोलीस ठाण्याच्या हद्दीत उघड झाली.
याप्रकरणी, खोलापुरी गेट पोलिसांनी १३ फेब्रुवारी रोजी सायंकाळी आरोपी अविनाश राऊत (१९, रसुलपूर) याच्याविरूद्ध बलात्कार व पोस्कोअन्वये गुन्हा दाखल केला. वैद्यकीय तपासणीनंतर ही बाब उघड झाली. तक्रारीनुसार, आरोपी व पिडित मुलीची मागील वर्षभरापासून मैत्री आहे. त्यातून पुढे त्यांच्यात प्रेमसुत जुळले. दोघांमध्ये सोशल मिडियावरून संवाद वाढला. दोघांचे फोनवरून बोलणे सुरू झाले. पुढे प्रेमालाप अधिकच वाढला. अशातच, नोव्हेंबर २०२२ मध्ये पिडिताची आई घराबाहेर गेली असताना पिडिता ही एकटीच होती. त्यावेळी आरोपी तिच्या घरात शिरला. आपण लग्न करू या, अशी बतावणी करून त्याने तिच्याशी शारीरिक संबंध प्रस्थापित केले.
असे फुटले बिंग
त्या घटनेनंतर पिडित मुलीला स्वत:त शारीरीक बदल जाणवायला लागले. दोन तीन दिवसांपुर्वी तिच्या पोटात दुखू लागल्याने तिने ती बाब आईला सांगितली. तिची आई तिला स्थानिक पीडीएमसी दवाखान्यात घेऊन गेली. तेथे तपासणीअंती ती अल्पवयीन मुलगी गर्भवती असल्याचे निदान डॉक्टरांनी केले. ते ऐकून पीडितासह तिच्या आईच्या पायाखालची वाळू सरकली. ही बाब गाडगेनगर पोलीस ठाणे व बालकल्याण समितीला कळविण्यात आली. पोलीस उपनिरिक्षक महिलेने तिचे बयाण नोंदवून घेतले. त्यानुसार ती १५ वर्षे ९ महिने वयाची आहे. आरोपीने तिच्याशी केलेल्या कुकृत्याची पोलिसांना माहिती दिली. त्यानुसार, आरोपीविरूद्ध गुन्हा दाखल केला. आरोपीला अटक करण्यात आली.
संबंधित अल्पवयीन मुलीच्या बयाणावरून आरोपीविरूद्ध गुन्हा दाखल केला. तिने आपल्या बयानात संपूर्ण घटनाक्रम सांगितला आहे. आरोपीला तातडीने अटक करण्यात आली.
- गजानन तामटे, ठाणेदार, खोलापुरी गेट