बाळापूर : तालुक्यातील गोरेगाव बु. येथील एका महिलेच्या तक्रारीनुसार बाळापूर पोलिसांनी २७ वर्षीय युवकाविरुद्ध शुक्रवारी लैंगिक अत्याचाराची तक्रार दिली होती. त्यानुसार पोलिसांनी त्याच्याविरुद्ध गुन्हा दाखल केला. यामुळे व्यथित झालेल्या युवकाने गळफास घेऊन आत्महत्या केल्याची घटना शनिवारी सकाळी घडली. यामुळे गावात तणाव निर्माण झाल्याने, बाळापूर पोलिसांनी गावात धाव घेऊन परिस्थिती नियंत्रणात आणली.
एका ३० वर्षीय महिलेने गावातील नीलेश तारिंगे (वय २७) याने तिच्यावर लैंगिक अत्याचार केल्याची बाळापूर पोलीस ठाण्यात तक्रार दिली. तक्रारीनुसार पोलिसांनी गोरेगाव बुद्रुक येथील नीलेश तारिंगे या युवकाविरुद्ध २९ जानेवारी रोजी सायंकाळी विविध कलमांनुसार गुन्हा दाखल केला. गुन्हा दाखल झाल्याची माहिती युवकाला समजताच, तो व्यथित झाला. गावासह नातेवाइकांमध्ये बदनामी होईल. या भीतीने युवकाने गळफास घेऊन आत्महत्या केली. यामुळे परिसरात खळबळ उडाली. गावामध्ये तणावाची परिस्थिती निर्माण झाली. प्रकरण चिघळण्याची भीती असल्याने, बाळापूर पोलिसांनी गावाकडे धाव घेतली आणि दोन्ही गटांतील लोकांची समजूत काढून परिस्थितीवर नियंत्रण मिळविले. गावातील तणावाची परिस्थिती पाहता, पोलीस बंदोबस्त तैनात करण्यात आला आहे. युवकाच्या आत्महत्या प्रकरणी पोलिसांनी आकस्मिक मृत्यूची नोंद केली आहे. पुढील तपास पोलीस करीत आहेत.