कुरुम : राष्ट्रीय महामार्ग क्र. ६ वरील कुरूमनजीक एका ढाब्यासमोर भरधाव ट्रकने दुचाकीला धडक दिली. यात एक जण जागीच ठार तर एक जण गंभीर जखमी झाल्याची घटना मंगळवारी सायंकाळी ७:३० वाजताच्या सुमारास घडली.
मधापुरी येथील रहिवासी ऋषिकेश अनिल ठाकरे (२३) व विपुल सुनील साव (२१) हे दोघे एमएच ३० एएल ७०४ क्रमांकाच्या दुचाकीने मूर्तिजापूर येथून गावी मधापुरीकडे येत असताना राष्ट्रीय महामार्गावर ढाब्यासमोर एमएच २ डब्लू ४६२५ क्रमांकाच्या भरधाव ट्रकने दुचाकीला धडक दिली. दुचाकी ट्रकच्या मागच्या चाकात आल्याने दुचाकीस्वार ऋषिकेश अनिल ठाकरे हा जागीच ठार झाला तर विपुल सुनील साव हा गंभीर जखमी झाला. घटनेची माहिती मिळताच माना पो.स्टे. ठाणेदार संजय खंडारे, एएसआय बालकृष्ण नलावडे, नापोकॉ संदीप सरोदे, चंद्रकांत नागापुरे नीलेश इंगले, विठ्ठल राठोड घटनास्थळी दाखल झाले. कुरुम, नवसाळ, मधापुरी येथील गावकऱ्यांच्या मदतीने मृतदेह व गंभीर जखमी युवकाला रुग्णवाहिकेने अमरावती येथील रुग्णालयात हलविले. रात्री उशिरापर्यंत माना पोलीस ठाण्यात गुन्हा दाखल करण्याची प्रक्रिया सुरू होती.