सचिन राऊत
अकोला - बाळापूर येथील कोल्ड स्टोरेजमध्ये कॅल्शियम कार्बाइडने पिकविल्या जाणार्‍या आंब्याच्या साठ्यावर अन्न व औषध प्रशासन विभागाने गुरुवारी छापेमारी केली. या छापेमारीत आरोग्यास घातक असलेला सुमारे दोन हजार ८९६ (तीन टन) किलो आंबा जप्त करण्यात आला आहे. जिल्ह्यात आंध्रप्रदेश आणि कर्नाटक येथून ट्रकने येत असलेला आंबा कॅल्शियम कार्बाइडने पिकविल्या जात असल्याचे वृत्त लोकमतने प्रकाशित केल्यानंतर अकोला अन्न व औषध प्रशासन आणि अमरावती येथील दक्षता पथकाने ही कारवाई केली. आंब्याचा साठ्यावर राज्यातील ही पहिली कारवाई करण्यात आल्याची माहिती अधिकार्‍यांनी दिली.जिल्ह्यात आंब्याची मोठ्या प्रमाणात मागणी आहे. त्यामुळे आंध्रप्रदेश आणि कर्नाटक येथून दर तिसर्‍या दिवशी तब्बल ८ ते १० ट्रक कच्चा आंबा विविध ठिकाणांवर आणून त्यावर प्रक्रिया केल्यानंतर सदर आंबा बाजारात विक्रीसाठी आणण्यात येत आहे. आंबे पिकविण्यासाठी सर्रास कॅल्शियम कार्बाइडचा वापर करण्यात येत असून, यामध्ये फॉस्फरस आणि अर्सेनिक हे रासायनिक घटक असल्याने हा पिकलेला आंबा यकृत आणि किडनीवर गंभीर परिणाम करतो. यासोबतच आंब्यातील रसाला पिवळा रंग आणण्यासाठी गॅसचा वापर करण्यात येत असून, आंबा सडू नये यासाठीही त्यावर विशेष प्रक्रिया करण्यात येत असल्याचे केंद्रच अकोल्यात असल्याचे लोकमतने समोर आणले होते. या वृत्तानंतर अन्न व औषध प्रशासन विभागाचे मुंबई येथील दक्षता पथकाचे सहआयुक्त यांनी दिलेल्या आदेशावरून अमरावती दक्षता पथक आणि अकोला अन्न व औषध प्रशासनाने बाळापूर येथील कोल्ड स्टोरेजवर गुरुवारी छापा मारून आरोग्यास घातक असलेला सुमारे दोन हजार ८९६ किलो आंबा जप्त केला. जप्त करण्यात आलेल्या आंब्याची किंमत दोन लाख रुपये असली तरी अन्न व औषध प्रशासनाने होलसेल दरानुसार या आंब्याची किंमत सुमारे ५५ हजार रुपये सांगितली. जप्त करण्यात आलेल्या आंब्याचा काही साठा नष्ट करण्यात आला असून, उर्वरित साठा जप्त करण्याची प्रक्रिया रात्री उशिरापर्यंत सुरू होती. ही कारवाई अकोला अन्न व औषध प्रशासन विभागाचे शरद कोलते, नीलेश ताथोड, रावसाहेब वाकडे, अमरावती दक्षता पथकाचे फरीद सिद्दीकी यांच्या पथकाने केली.