राष्ट्रीय महामार्गावर तीन अपघात;  एकाचा मृत्यू, तिघे गंभीर

देवमन अभिमान सदांशिव रा.देवळी, ता.जि.अकोला या दुचाकीस्वाराचा मृत्यू झाला.

मूर्तिजापूर: राष्ट्रीय महामार्गावर घडलेल्या तीन वेगवेगळ्या अपघातात एक ठार व तिघे जण गंभीर जखमी झाले आहेत. तिन्ही अपघात वेगवेगळ्या ठिकाणी शुक्रवारी झाले आहेत. राष्ट्रीय महामार्गावरील सोनोरी येथील मदरशाजवळ अज्ञात ट्रकने दुचाकी क्रमांक एम.एच.३०-ए.आर. ५२११ ला जोरदार धडक दिली. यामध्ये देवमन अभिमान सदांशिव रा.देवळी, ता.जि.अकोला या दुचाकीस्वाराचा मृत्यू झाला. सोबत असलेले प्रमोद पातोंड गंभीर जखमी झाले. सदर घटना शहर पोलीस स्टेशन अंतर्गत घडली. त्याचप्रमाणे दुसऱ्या अपघातातील कार अमरावतीकडून मूर्तिजापूरकडे येत असताना एका ट्रकने कारला धडक दिल्याने मूर्तिजापूर येथील एका युवकाचा हात तुटून पडल्याची घटना राष्ट्रीय महामार्गावरील गोडाउनजवळ घडली. गंभीर जखमी युवकाला अकोला येथे उपचारासाठी हलविण्यात आले. तर राष्ट्रीय महामार्गावरील हेंडज शासकीय पॉलिटेक्निकलजवळ अमरावतीकडून अकोलाकडे येत असलेल्या टेम्पोला अकोलाकडून रायपूरकडे जात असलेल्या मालवाहूने जबर धडक दिल्याची घटना रात्री १० वाजताच्या सुमारास घडली. या घटनेत अकोला येथील टेम्पोचालक खांडेकर नामक इसम गंभीररीत्या जखमी झाल्याची माहिती आहे. दोन्ही घटना ग्रामीण पोलीस स्टेशन अंतर्गत घडल्या. पुढील तपास शहर व ग्रामीण पोलीस करीत आहेत. (फोटो)