राष्ट्रीय महामार्गाच्या चौपदरीकरणाचे काम लवकर सुरू करा!

गोपीकिशन बाजोरिया यांची नितीन गडकरींकडे मागणी.

अकोला- राष्ट्रीय महामार्गाच्या चौपदरीकरणासोबतच खामगाव-जालना मार्ग आणि इतर रस्ते विकासांची कामे लवकर सुरू करण्यात यावी, अशी मागणी आमदार गोपीकिशन बाजोरिया यांनी केंद्रीय भूतल परिवहन मंत्री नितीन गडकरी यांच्याकडे शनिवारी केली. केंद्रीय मंत्री नितीन गडकरी अकोला आणि बुलडाणा जिल्ह्याच्या दौर्‍यावर असताना आ. बाजोरिया यांनी त्यांच्याकडे अकोला, बुलडाणा आणि वाशिम या जिल्ह्यातील रस्ते विकासाबाबतचे निवेदन सोपवून त्यांना ही कामे लवकर सुरू करण्याची विनंती केली. यात राष्ट्रीय महामार्ग क्रमांक ६ च्या चौपदरीकरणासोबत खामगाव-जालना मार्गाचाही समावेश आहे. याशिवाय जिल्ह्यातील इतर मार्गासाठीही निधी उपलब्ध करून देण्याची विनंती त्यांनी केंद्रीय मंत्री गडकरी यांच्याकडे केली. त्यावर गडकरी यांनी चौपदरीकरण कामाचे सर्वेक्षण सुरू असल्याचे सांगून हे काम पूर्ण होताच चौपदरीकरणाच्या प्रत्यक्ष कामाला सुरुवात होणार असल्याचे सांगितले. याशिवाय गडकरी यांनी खामगाव-जालना मार्गाला राष्ट्रीय महामार्गाचा दर्जा देणार असल्याचेही जाहीर केले. हे निवेदन सोपविताना आ. बाजोरिया यांच्यासोबत निकेश गुप्ता आणि चिखलीचे नगरसेवक नीलेश अंजनकर उपस्थित होते.