जिल्ह्यात विहिरींचे नियमबाह्य खोदकाम

३00-३५0 फूट खोलपर्यंत विंधन विहिरी खोदल्या जात आहेत.

वाशिम : जिल्हय़ात ग्रामीण भागात शासनाच्या विविध योजनांतर्गत सिंचन क्षेत्रवाढीसाठी पारंपरिक विहिरी, विंधन विहिरीचे नियमबाह्य व अर्मयाद खोदकाम सुरू आहे. हे खोदकाम करताना यापूर्वी खोदलेल्या विहिरीच्या ५00 फूट क्षेत्रात खोदकाम करू नये या शासनाच्या नियमाचे सर्रास  उल्लंघन केले जात आहे. तसेच २00 फूटपर्यंतच प्रवाही भूजल उपलब्ध असल्याने त्या खाली विंधन विहिरीचे खोदकाम करणे जलपातळी खालावण्यास कारणीभूत ठरणारे असते; परंतु या बाबीकडे दुर्लक्ष करून ३00-३५0 फूट खोलपर्यंत विंधन विहिरी खोदल्या जात आहेत.वाशिम जिल्हय़ात एकही मोठा सिंचन प्रकल्प नाही. तीन मध्यम व ९८ लघू पाटबंधारे प्रकल्प तसेच स्थानिक स्तर व जि.प.चे काही सिंचन तलाव, गावतळी व शेततळी असली तरी सिंचन क्षेत्र  केवळ ७0 हजार हेक्टर एवढे आहे. त्यामुळे सिंचनवाढीसाठी शासनाच्या जवाहर विहीर योजना, एकलक्ष विहीर योजना, पंतप्रधान पॅकेज यासह सिंचन क्षेत्र वाढीसाठी शासनाच्या विविध विभागांच्या वतीने राबविण्यात येणार्‍या योजनांमधून पारंपरिक व विंधन विहिरींचे खोदकाम सुरू आहे. शासनाच्या विविध योजनांमध्ये विहिरीसाठी शेतकर्‍यांना अनुदान दिले जाते. या नवीन विहिरींना मान्यता देण्यासाठी सदर विहिरीच्या क्षेत्रात ५00 फूट परिसरात यापूर्वी कोणत्याही विहिरीचे खोदकाम व बांधकाम झालेले नसावे, असा नियम आहे; परंतु हा नियम धाब्यावर बसवून सर्रास विहिरी मंजूर केल्या व बांधल्या जात आहे.