अकोला: जिल्हा परिषद कर्मचार्‍यांची ह्यबाबूगिरीह्ण संपविण्यासाठी एकाच कार्यालयात पाच वर्षांपासून कार्यरत असलेल्या कर्मचार्‍यांची बदली करण्यात आली. सोमवारपासून राबविल्या जात असलेल्या या प्रक्रियेत अनियमितता झाली आहे. सेवाज्येष्ठता डावलून बदल करताना सोयीच्या कर्मचार्‍यांना विभागात कायम ठेवण्यात आले असल्याचे बुधवारी उघडकीस आले. जिल्हा परिषद अर्थ विभागातील वरिष्ठ सहायक (लेखा) या संवर्गातील कर्मचार्‍यांच्या बदलीचे आदेश मंगळवारी देण्यात आले. बदली आदेश देताना सेवाज्येष्ठतेनुसार कार्यवाही होणे अपेक्षित होते. प्रत्यक्षात सेवाज्येष्ठता नियमाचे कोणतेही पालन न करता सोयीच्या कर्मचार्‍यांना विभागात कायम ठेवून इतरांची नियमात बसत नसतानाही बदली करण्यात आली. ९ वर्षे आणि १ महिना वित्त विभागात कार्यरत एन.व्ही. आखरे आणि आर.के. मानकर यांना बदली प्रक्रियेतून डावलण्यात आले. दुसरीकडे ५ वर्षे आणि ८ महिने सेवाज्येष्ठता असलेल्या जी.एम. नळकांडे आणि जी.एन. वानखडे यांची बदली करण्यात आली. नियमानुसार पाच वर्षांपेक्षा अधिक सेवा झालेल्या कर्मचार्‍यांची बदली करण्यात येत असली तरी बदली करण्याच्या नियमानुसार रिक्त पदं आणि बदली प्रक्रिया राबवित असताना रिक्त होणार्‍या पदांचा विचार करून सेवाज्येष्ठतेनुसार पात्र कर्मचार्‍यांची बदली करणे आवश्यक आहे. या नियमाकडे जिल्हा परिषद अर्थ विभागात बगल देण्यात आले दिसून येते.
अकोला जिल्हा परिषद कर्मचार्‍यांच्या बदल्यांमध्ये अनियमितता
By admin | Updated: June 12, 2014 20:31 IST