- सत्यशील सावरकर
तेल्हारा : राज्यात कोरोना कहर सुरूच आहे. त्यामुळे ‘लॉकडाउन’ वाढतच आहे. आधीच ठरलेले लग्न पुढे न ढकलता एकाच गावातील नवरदेव-नवरी असलेल्या जोडप्याने ग्रामपंचायत कार्यालयात घरापासून चार-पाच नातेवाइकांसह चक्क पायदळ जात नोंदणी विवाह करून कोरोना ‘सोशल डिस्टन्स’ व खबरदारी पाळत विवाह केला.लग्न म्हटले म्हणजे घोडा, गाडी, पाहुणे मंडळी, हौस, मजा आलीच. त्यात नवरदेव-नवरी एकाच गावातील असल्यास मित्र, नातेवाईक व दोन्हींकडील कार्यक्रमामध्ये उत्साह वाढतो. तालुक्यातील गाडेगाव येथील श्रीधर मनोहर मिरगे यांचे चिरंजीव अंकुश नवरदेव व गावातीलच अरुण रामराव वाकोडे यांची कन्या माधुरी नवरी यांचा विवाह कोरोना विषाणू संसर्ग खबरदारी व ‘लॉकडाउन’ काळात पाडावयाची सतर्कता पाळून अगदी ठरल्याप्रमाणे कुठलाही लवाजमा न करता मोजक्या मंडळीत ग्रामपंचायत कार्यालयात नोंदणी पद्धतीने करण्यात आला. सरपंच प्रमोद वाकोडे यांच्या हस्ते वर अंकुश श्रीधर मिरगे व वधू माधुरी अरुण वाकोडे यांना नोंदणी प्रमाणपत्र देण्यात आले. यावेळी केशवराव ताथोड, संजय वडतकार, मुरलीधर सोनोने, विजय बोर्डे, गोकुळ हिंगणकार, काशीनाथ वाकोडे, नातेवाईक व ग्रामपंचायत सदस्य कर्मचारी उपस्थित होते. (प्रतिनिधी)