‘फोर-जी’ची बैठक उधळली!

काँग्रेसचा हल्लाबोल; आयुक्त, नगरसेवकांची धावाधाव.

अकोला: अकोलेकरांना मूलभूत सुविधा पुरविण्यापेक्षा फोर-जीच्या खोदकामाला प्राधान्य देणार्‍या आयुक्त सोमनाथ शेटे यांनी स्थानिक विश्रामगृहावर आयोजित केलेल्या सर्वपक्षीय गटनेत्यांच्या बैठकीवर मंगळवारी काँग्रेसने हल्लाबोल केला. विरोधी पक्षनेता साजीद खान पठाण व काँग्रेस नगरसेवकांनी आयुक्तांची बैठक उधळून लावत सत्ताधार्‍यांच्या मनसुब्यांवर पाणी फेरले. या प्रकारामुळे आयुक्तांसह उपस्थित सत्तापक्षातील नगरसेवकांची अक्षरश: धावाधाव झाल्याचे चित्र पाहावयास मिळाले. येत्या आठवड्यात संत गजानन महाराज यांच्या पालखीचे शहरात आगमन होत असून, त्यानंतर रमजान महिन्याला प्रारंभ होईल. गजानन महाराजांच्या पालखीचा शहरात दोन दिवस मुक्काम असतो. शहरातील मुख्य रस्ते, बाजारपेठ, सार्वजनिक ठिकाणांसह कानाकोपर्‍यात प्रचंड प्रमाणात घाण साचली आहे. मुख्य रस्त्यालगतचे नाले,गटारे घाणीने तुडुंब साचले असताना महापालिका प्रशासनासह सत्ताधारी भाजप-शिवसेना ढिम्म आहे. प्रभागनिहाय नाला सफाईला सुरुवात झाल्याचा दावा आयुक्त सोमनाथ शेटे यांच्याकडून होत असला तरी प्रत्यक्षात नाला सफाईची कामे ठप्प पडून आहेत. मनपातील पदाधिकारी व बोटावर मोजता येणार्‍या नगरसेवकांच्या प्रभागात नाला सफाईची कामे सुरू झाली असून, इतर भागात मात्र घाणीमुळे अकोलेकरांना नरकयातना सहन कराव्या लागत आहेत. पहिल्याच पावसात नाल्यांमधील घाण पाणी रस्त्यावर साचले तर सर्व्हिस लाईन काटेरी झाडे-झुडपांनी वेढल्या गेल्याचे चित्र आहे. रस्ते, पथदिवे व पाणीपुरवठय़ाची सेवा पूर्णत: कोलमडली आहे. पावसामुळे वातावरणातील बदल लक्षात घेता, शहरात साथ रोगांचा उद्रेक होण्याची चिन्हं असताना आयुक्त सोमनाथ शेटे यांनी मंगळवारी दुपारी १२ वाजता स्थानिक विश्रामगृह येथे फोर-जीच्या खोदकामाला परवानगी देण्यासाठी सर्वपक्षीय गटनेत्यांच्या बैठकीचे आयोजन केले. हा प्रकार ध्यानात येताच, विरोधी पक्षनेता साजीद खान, नगरसेवक दिलीप देशमुख, शेख अजीज यांसह इतर नगरसेवकांनी थेट बैठकीवरच हल्लाबोल केला. यामुळे विश्रामगृहावर जमलेल्या आयुक्त सोमनाथ शेटे यांच्यासह भाजप-शिवसेनेचे पदाधिकारी व नगरसेवकांना अक्षरश: पळ काढावा लागला.