अकोला जिल्ह्यात शेतक-याची आत्महत्या

बाळापूर तालुक्यातील व्याळा येथील घटना.

अकोला : बाळापूर तालुक्यातील व्याळा येथील शेतकरीपुत्राने २८ मे रोजी सकाळी गावाशेजारी असलेल्या एका शेतामधील झाडाला गळफास लावून आत्महत्या केल्याची घटना घडली. व्याळा शहरातील झोपडपट्टी भागातील रहिवासी असलेल्या दत्ता भास्कर नटकुटे या ३२ वर्षे वयाच्या शेतकरीपुत्राने गावालगतच्या एका शेतामध्ये असलेल्या बाभळीच्या झाडाला गळफास लावून आत्महत्या केली. सदर युवकाच्या वडिलाचे निधन झालेले असून, तो त्याच्या आईसोबत राहत होता. त्याच्या आईच्या नावाने पाच एकर शेतजमीन आहे. त्याने केलेल्या आत्महत्येचे वृत्त समजताच पोलीस उपनिरीक्षक सोळंके, जमादार गिरी यांनी घटनास्थळाला भेट दिली. त्यांनी या घटनेचा पंचनामा करून मृतदेह पोस्टमॉर्टेमसाठी अकोल्यास रवाना केला. या प्रकरणी पुढील तपास बाळापूर पोलीस करीत आहेत.