अकोला : जिल्ह्यातील सहा तालुक्यांत रिक्त असलेल्या १६ सरपंचपदांचे आरक्षण नव्याने जाहीर करण्यात आले असून, आरक्षणानुसार सरपंचांची निवड करण्यासाठी सरपंचपदांची ८ एप्रिल रोजी निवडणूक घेण्याचा आदेश जिल्हाधिकारी जितेंद्र पापळकर यांनी मंगळवारी तहसीलदारांना दिला. त्यानुसार संबंधित ग्रामपंचायतींच्या पहिल्या विशेष सभेत सरपंचांची निवड करण्यात येणार आहे.
जिल्ह्यातील २२४ ग्रामपंचायतींच्या सार्वत्रिक निवडणुकांचे निकाल जाहीर झाल्यानंतर ९ व ११ फेब्रुवारी रोजी सरपंच आणि उपसरपंचपदांची निवडणूक घेण्यात आली. त्यामध्ये सरपंचपदांच्या आरक्षणानुसार अनुसूचित जाती आणि अनुसूचित जमाती या प्रवर्गातील सदस्य निवडून आले नसल्याने, अनुसूचित जाती प्रवर्गातील ३ व अनुसूचित जमाती प्रवर्गातील १३ असे एकूण १६ सरपंचपदे राहिली. त्यामुळे रिक्त सरपंचपदांचे आरक्षण नव्याने १६ मार्च रोजी जाहीर करण्यात आले. त्यानंतर आरक्षण सोडतीनुसार रिक्त असलेल्या तेल्हारा, अकोट, अकोला, बाळापूर, बार्शिटाकळी व पातूर या सहा तालुक्यातील १६ सरपंचपदांची निवडणूक ८ एप्रिल रोजी घेण्याचा आदेश ३० मार्च रोजी जिल्हाधिकारी जितेंद्र पापळकर यांनी संबंधित तहसीलदारांना दिला. त्यानुसार संबंधित १६ ग्रामपंचायतींच्या पहिल्या विशेष सभेत सरपंच पदांची निवडणूक घेण्यात येणार आहे.
‘या’ ग्रामपंचायतींच्या सरपंच पदांची होणार निवडणूक !
तेल्हारा तालुक्यातील चांगलवाडी, सौंदळा, वांगरगाव, अकोट तालुक्यातील चोहोट्टा, सावरा, मक्रमपूर, मंचनपूर, पातोंडा, अकोला तालुक्यातील खांबोरा, बाळापूर तालुक्यातील अंत्री मलकापूर, बार्शिटाकळी तालुक्यातील लोहगड व पातूर तालुक्यातील चरणगाव, दिग्रस खुर्द, आलेगाव, विवरा व चतारी इत्यादी १६ ग्रामपंचायतींच्या रिक्त सरपंचपदांची निवडणूक घेण्यात येणार आहे.
अध्यासी अधिकाऱ्यांची नेमणूक !
जिल्ह्यातील सहा तालुक्यातील रिक्त १६ सरपंचपदांच्या निवडणुकीसाठी ग्रामपंचायतींच्या विशेष सभा घेण्यात येणार आहेत. त्यामध्ये सरपंचांची निवड करण्यात येणार आहे. त्याआनुषंगाने ग्रामपंचायतींच्या विशेष सभांचे अध्यासी अधिकारी म्हणून १६ अधिकाऱ्यांची नेमणूक करण्यात आली आहे. त्यामध्ये महसूल मंडळ अधिकारी, पुरवठा निरीक्षक व विस्तार अधिकारी इत्यादी संवर्गातील अधिकाऱ्यांचा समावेश आहे.