कंपनी म्हणते, सर्व कामांची वर्कऑर्डर द्या!

अकोल्यातील कापशी तलाव सौंदर्यीकरणाचा तिढा सभेत.

अकोला : कापशी तलावाच्या सौंदर्यीकरणासह शहरातील आठ जागांवर विकासकामे करण्यासाठी प्रशासनाने तांत्रिक सल्लागारपदी मुंबई येथील ह्यफोर्टरेसह्ण एजन्सीची निवड केली. कापशी तलाव वगळता इतर कामांसाठी कंपनीने सादर केलेले दर लक्षात घेता, मनपाने अद्यापपर्यंत कार्यादेश (वर्कऑर्डर) दिले नाहीत. कंपनीने मात्र सर्व कामांची वर्कऑर्डर द्या, असे पत्र मनपाला दिले असून, कंपनीचे दर पाहता, हा विषय मंजुरीसाठी सर्वसाधारण सभेसमोर ठेवण्याचे संकेत प्रशासनाने दिले आहेत. मनपाच्या मालकीच्या कापशी तलावाला पर्यटनस्थळ बनविण्यासाठी प्रशासन प्रयत्नरत आहे. १९७८ पासून शहरवासीयांना काटेपूर्णा प्रकल्पातून पाणीपुरवठा होत असल्याने कापशी तलावाची पाणीपुरवठा योजना ठप्प पडली. कापशी तलावाला पर्यटनस्थळ बनविण्यासाठी तत्कालीन आयुक्त चंद्रशेखर रोकडे यांनी केलेले प्रयत्न वादाच्या भोवर्‍यात सापडले होते. तत्कालीन आयुक्त डॉ. विपीनकुमार शर्मा यांच्या कालावधीत कापशी तलावाच्या सौंदर्यीकरणासाठी शासनाकडून मंजूर झालेले २५ कोटींचे अनुदान नियोजनाअभावी परत गेले. या सर्व बाबी ध्यानात घेता, आयुक्त डॉ. कल्याणकर यांनी कापशी तलाव व परिसराची पाहणी केली. तलावाच्या ठिकाणी सौंदर्यीकरण करण्यासाठी सामाजिक संस्थांना आवाहनदेखील केले. यानंतर कापशी तलावाच्या सौंदर्यीकरणासाठी तांत्रिक सल्लागार नियुक्तीसाठी निविदा प्रक्रिया जारी करण्यात आली. ऑगस्ट महिन्यात निविदा प्रसिध्द केल्यावर नोव्हेंबर महिन्यापर्यंत निविदा उघडण्याची प्रशासनाने तसदीच घेतली नाही. डिसेंबर महिन्यात निविदा उघडल्यानंतर मुंबईतील ह्यफोर्टरेसह्ण नामक एजन्सीची निवड करण्यात आली. यामध्ये तलावाच्या सौंदर्यीकरणासह शहरातील मोक्याच्या आठ जागांवर विकास कामे करण्यासाठी कंपनीकडून तांत्रिक मार्गदर्शन मिळणार आहे. कापशी तलावाच्या सौंदर्यीकरणासाठी तांत्रिक सल्लागारसाठी फोर्टरेस एजन्सीची निविदा मंजूर करण्यात आली. मोक्याच्या आठ जागांवर विकासकामे करण्याचाही यामध्ये समावेश आहे. एजन्सीला वर्कऑर्डर देण्यावर प्रशासन विचाराधीन आहे. कामे लवकरच मार्गी लागतील, असे मनपाचे कार्यकारी अभियंता जयप्रकाश मनोहर यांनी सांगीतले.