मूर्तिजापूर : येथून काही अंतरावर असलेल्या व ग्रामीण पोलीस स्टेशन अंतर्गत येत असलेल्या सिरसो फाट्या नजीक मीनी मालवाहू व अॉटो रिक्षात झालेल्या धडकेत ६ वर्षाची चिमुकली घटनास्थळीच ठार झाली तर अॉटोत असलेल्या १० प्रवाशांपैकी चौघे गंभीर जखमी झाले, सदर घटना २० नोव्हेंबर रोजी दुपारी ३:३० वाजताच्या दरम्यान घडली.
अॉटोतील सर्व प्रवासी दसरा मैदान अमरावती येथील रहिवासी असून ते अॉटोने हातगाव येथील लग्नसमारंभात आले होते. राष्ट्रीय महामार्ग अत्यंत खराब असल्याने लग्नसमारंभ आटोपून एमएच २७ बीडब्ल्यू ३०४१ या क्रमांकाच्या अॉटो रिक्षाने अमरावतीला दर्यापूर मार्गाने परत जात असताना सिरसो फाट्या नजीक विरुद्ध दिशेने येत असलेल्या एमएच ३० एव्ही ०३७८ क्रमांच्या मीनी मालवाहूने जोरदार धडक दिली. या अपघातात अंकिता गणेश गायकवाड (६ वर्षे ) ही चिमुकली घटनास्थळीच ठार झाली. तर गणेश महादेव गायकवाड (४५), सुधीर खडसे (३४) वत्सला दीपक इंगोले (४५) आणि भारती गाणेश गायकवाड (३५) हे चौघे गंभीर जखमी झाले. इतर प्रवाशीही जखमी झाले आहेत. चौघांची प्रकृती गंभीर असल्याने त्यांना पुढील उपचारासाठी अमरावती येथे पाठविण्यात आले आहे. घटनेची माहिती मिळताच येथील वंदेमातरम आपत्कालीन पथकाने घटनास्थळी धाव घेऊन जखमींना येथील लक्ष्मीबाई देशमुख उपजिल्हा उपचारासाठी दाखल केले. या प्रकरणी अधिक तपास हेड कॉन्स्टेबल सुभाष उघडे करीत आहे.