लोकमत न्यूज नेटवर्क
अकाेला : सध्या सण - उत्सवाचा काळ असून, या फेस्टिव्हल सिझनमध्ये विविध ऑफर्स घेऊन लहान-मोठे व्यापारी बाजारात दाखल होत आहेत. त्यांचे उत्पादन विकले जावे म्हणून ते फेस्टिव्हल सिझनचा आधार घेऊन ग्राहकांना आकर्षित करणाऱ्या ऑफर्स देत आहेत. अशातच दाखविले जाते वेगळे आणि मिळते भलतेच काही. तेव्हा फसवणूक झाल्याचे कळल्यावर अनेक जण सायबर पोलीस स्टेशनची पायरी चढताना दिसत आहेत.
कोरोनामुळे सगळ्याच क्षेत्राला मरगळ आली आहे. यामध्ये लहान-मोठे व्यापारी आता त्यांची तूट भरून काढण्यासाठी विविध आकर्षक ऑफर्स देऊन ग्राहकांना आपल्याकडे वळविण्याचा प्रयत्न करीत आहेत. अशा फसव्या ऑफर्सना सर्वसामान्य ग्राहक बळी पडत असून, त्यांची फसवणूक होत असल्याची माहिती समोर येत आहे.
त्यामुळे अशा फसव्या जाहिरातींवर विश्वास न ठेवता खातरजमा करून वस्तू खरेदी कराव्यात, असे आवाहन सायबर पोलिसांनी केले आहे. त्यामुळे खरेदी करताना जरा जपून, करा असे आवाहन पाेलिसांनी केले आहे.
...अशी होऊ शकते फसवणूक
कधी कधी बऱ्याच आकर्षक ऑफर देऊन ग्राहकांना फसविले जाते, तर काही वेळा चुकीची ऑर्डर देऊन फसवणूक केली जाते. या ऑफरमध्ये नमूद केलेल्या किंवा दर्शविलेल्या ऑफर बऱ्याच वेळा चुकीच्या असतात. त्यांचा मुख्य हेतू लोकांना फसविणे, हा असतो. यानंतर इतरही मार्ग आपल्यासाठी फसवणारे ठरू शकतात.
काही वेळा ग्राहकांना वस्तू दाखविण्यात येतात. मात्र, डिलिव्हरीआधीच ग्राहकांडून पैसे मागविले जातात. पैसे ऑनलाईन पद्धतीने मागवूनही, त्या ग्राहकांना वस्तू दिल्या जात नाहीत. तसेच काही वेळा पैसे घेऊन खराब किंवा बऱ्याच वेळा दुसऱ्याच वस्तू पाठविल्या जातात.
...ही घ्या काळजी
माहितीच्या आणि विश्वासार्ह वेबसाईटवरून खरेदी करा, एसएसएल असलेल्या साईट्सद्वारेच खरेदी करा, कारण या वेबसाईट्स युझर्सने इनपुट केलेला डेटा संग्रहीत करण्यास अधिक सक्षम आहेत.
या साईट्स ओळखणे सोपे आहे. कारण त्या एचटीटीएऐवजी एचटीटीपीएसने सुरू होतात आणि त्यांच्या ॲड्रेस बारमध्ये लॉक पॅडलॉक चिन्ह असते.
वेबसाईटचे लुक्स बघून खरेदी करू नका. अनेकदा वेबसाईट दिसण्यास आकर्षक दिसते. मात्र, यामुळे तुमची फसवणूक होऊ शकते.
जर तुम्हाला अशा साईट्स ओळखायच्या असतील, तर प्रोडक्ट्सच्या माहितीत आणि वेबसाईटवर शब्दांमध्ये तुम्हाला अनेक चुका आढळतील.
नागरिकांनी कोणत्याही प्रलोभनाला बळी पडू नये, खोट्या जाहिरातींकडे आकर्षित न होता कमी पैशात आणि कमी खर्चात मोठी वस्तू मिळत असेल तर त्याची खात्री करून घ्यावी, काही अनुचित प्रकार वाटत असल्यास सायबर पोलिसांशी संपर्क करा.
-
विलास पाटील
प्रमुख दहशतवादविराेधी कक्ष
ऑनलाईन फसवणूक
जानेवारी ३
फेब्रुवारी २
मार्च ३
एप्रिल ३
मे ४
जून २
जुलै ३
ऑगस्ट ४