अकोला : शहरासह जिल्ह्यात मद्यसम्राट म्हणून ओळख असलेल्या राजू जयस्वाल याने पूर्वीच्या मित्रावरच संतापात अश्लील शिवीगाळ करून लोखंडी पाइपने हल्ला केल्याची घटना दाेन दिवसांपूर्वी घडली. सुरुवातीला हे प्रकरण आपसात मिटविण्यात आल्याचे सांगण्यात आले. मात्र सिव्हिल लाइन्स पाेलिसांनी या प्रकरणात जयस्वाल यांच्याविरुद्ध मारहाण करून गंभीर जखमी केल्याप्रकरणी गुन्हा दाखल केला आहे.
जठारपेठ परिसरातील रहिवासी जॉय जॉन व राजू जयस्वाल यांची अनेक वर्षांपासून मैत्री आहे. मात्र आरोपी राजेंद्र जयस्वाल याने पाच वर्षांपूर्वी दोन नंबरचा व्यवसाय करण्याचे सांगितले होते. या व्यवसायाला विराेध केल्याने त्याचाच राग मनात ठेवून राजू जयस्वाल यांनी जाॅय जाॅन यांच्यावर ११ जुलैच्या रात्री लाेखंडी पाइपने हल्ला चढविला. जाॅय जाॅन हे त्यांचा मित्र आशिष देवकर यांच्यासाेबत उभे असताना राजू जयस्वाल त्या ठिकाणी आले व जॉय जॉन यांना अश्लील शिवीगाळ करत लोखंडी पाइपने मारहाण केली. तसेच जीवे मारण्याची धमकी दिल्याची तक्रार जॉय जॉन यांनी सिव्हिल लाइन पोलीस ठाण्यात दिली. तक्रारीवरून सिव्हिल लाइन पोलिसांनी आरोपीविरोधात भारतीय दंड विधानाच्या कलम ३२४, ५०४, ३४ नुसार गुन्हा दाखल केला आहे.