शहरात २५० जण पॉझिटिव्ह

रॅपिड अँटिजन टेस्टसाठी नागरिकांची गर्दी

अकोला: फेब्रुवारी महिन्यापासून शहरात कोरोनाचा संसर्ग झपाट्याने वाढल्याचे दिसून आले आहे. कोरोनाची लक्षणे आढळून येणाऱ्या नागरिकांनी रॅपिड अँटिजन टेस्ट करण्याला प्राधान्य दिल्याचे दिसून येते. मंगळवारी मनपाच्या विविध चाचणी केंद्रांमध्ये ७७७ नागरिकांनी रॅपिड चाचणी केली तसेच उर्वरित ३२२ जणांनी आरटीपीसीआर चाचणी केली. संबंधितांचे नमुने चाचणीसाठी जिल्हा सामान्य रुग्णालयाकडे पाठविण्यात आले आहेत.

टाळेबंदीतही आंब्याची विक्री

अकोला: कोरोना विषाणूच्या संसर्गाला अटकाव घालण्याच्या उद्देशातून जिल्हा प्रशासनाने १५ मे पर्यंत शहरासह जिल्ह्यात टाळेबंदी लागू केली आहे. यादरम्यान, शहरात पोलिसांच्या वतीने कडेकोट बंदोबस्त तैनात करण्यात आल्याचे दिसून येते. तरीही खुले नाट्यगृह ते फतेह अली चौक या मार्गावर हातगाडीवर आंबे विक्री करताना लघु व्यावसायिक दिसून येतात.

शहरात ॲम्बुलन्सला नो एंट्री!

अकोला: जिल्हा प्रशासनाने शहरासह संपूर्ण जिल्ह्यात टाळेबंदी लागू केली आहे. अर्थात या कालावधीत अत्यावश्यक सेवा देणाऱ्या महापालिकेच्या आरोग्य विभागातील तसेच स्वच्छता व जलप्रदाय विभागातील कर्मचाऱ्यांना मुभा देण्याची गरज असताना पोलिसांकडून नाहक त्रास दिला जात आहे. हा प्रकार कमी म्हणून की काय, चक्क रुग्णवाहिकेला सुद्धा पोलीस नकार देत असल्याचे समोर येत आहे. या प्रकाराची शहर पोलीस उपअधीक्षक सचिन कदम दखल घेतील का, असा सवाल उपस्थित होत आहे.