दुचाकी-कार अपघातात आजोबा-नातवाचा मृत्यू

शेवगाव : दुचाकी- कार अपघातात आजोबा- नातवाचा मृत्यू झाला. आजी गंभीर जखमी असून, तिच्यावर रुग्णालयात उपचार सुरू आहेत. शुक्रवारी (दि.२३) दुपारच्या सुमारास शेवगाव तालुक्यातील भातकुडगाव फाट्याजवळील दत्तपाटी येथे हा अपघात घडला.

अपघातात दुर्योधन भालचंद्र आरगडे (वय ५३), प्रथमेश प्रमोद आरगडे (वय ६, दोघेही रा. सौंदाळा, ता. नेवासा), असे निधन झालेल्या आजोबा, नातवाचे नाव आहे. मीनाबाई दुर्योधन आरगडे (वय ४८) या गंभीर जखमी झाल्या आहेत.

सौंदाळा येथील दुर्योधन आरगडे हे पत्नी मीनाबाई, नातू प्रथमेश यांच्यासह मुलीला भेटण्यासाठी वरूर (ता. शेवगाव) येथे आले होते. मुलीची भेट घेऊन शुक्रवारी (दि.२३) ते वरूर येथून सौंदाळा येथे चालले होते. सायंकाळी ४ वाजेच्या सुमारास शेवगाव- नेवासा राज्यमार्गावर दत्तपाटीनजीक त्यांच्या दुचाकीला नेवासामार्गे येणाऱ्या कारने समोरून जोराची धडक दिली. अपघाताची माहिती समजताच त्यांच्या नातेवाइकांसह इतरांनी जखमींना तातडीने उपचारार्थ शेवगाव येथील रुग्णालयात हलविले; परंतु तत्पूर्वीच प्रथमेश आरगडे याचा मृत्यू झाला.

त्याच्यावर शुक्रवारी रात्री उशिरा अंत्यसंस्कार करण्यात आले. दुर्योधन व मीनाबाई यांना पुढील उपचारार्थ नगर येथे घेऊन येताना दुर्योधन आरगडे यांचा वाटेतच मृत्यू झाला. त्यांच्यावर शनिवारी दुपारी अंत्यसंस्कार करण्यात आले. मीनाबाई आरगडे याही गंभीर जखमी असून, त्यांच्यावर विळद घाटातील रुणालयात उपचार सुरू आहेत. याप्रकरणी शेवगाव पोलिसांनी अकस्मात मृत्यूची नोंद केली आहे.

---

२४ दुर्योधन आरगडे, २४प्रथमेश आरगडे