साकुरला मजुराचा खून

राहाता: दारू पिण्यासाठी ५० रूपये मागितले असता ते दिले नाही, याचा राग आल्याने बांधकाम मजुराच्या छाती व पोटावर वार करण्यात आले़ या हल्लयात मजूर गंभीर जखमी झाला़ औषधोपचार चालू असताना त्याचा मृत्यू झाला़ या प्रकरणी दोघांविरूद्ध राहाता पोलीस ठाण्यात गुन्हा दाखल करण्यात आला आहे़ सोनीसिंह पोहलाद यादव (वय २५, दमोह, मध्यप्रदेश) हा मजुर इतर साकुरी हद्दीत अनिल तात्यासाहेब तोरडमल यांच्या बांधकामावर काम करीत होता़ शुक्रवारी रात्री साडे दहाच्या सुमारास आरोपी अक्षय आप्पासाहेब दाभाडे (रा़ नांदुर्खी, ता़ राहाता) याने तिथे येवून मयत सोनीसिंह यांच्याकडे दारू पिण्यासाठी ५० रूपये मागितले़ त्यास नकार दिल्याचा राग आल्याने आरोपी दाभाडे याने सोनिसिंह याच्या छातीवर, पोटावर चाकूने वार केले़ यामध्ये सोनिसिंह गंभीर जखमी झाला़ सदर घटना कुणाला सांगितली तर तुलाही जीवे मारीन असा दम आरोपी दाभाडे याने मयत सोनिसिंह याच्या जोडीदाराला दिला व तो पळून गेला. सोनिसिंह यास उपचारासाठी साईबाबा संस्थानच्या रूग्णालयात दाखल केले. परंतु उपचार सुरू असताना त्याचा मृत्यू झाला़ मयताचा पुतण्या सुरताजसिंह फुलसिंह लोधी याने दिलेल्या फिर्यादीवरून आरोपी अक्षय दाभाडे याच्या विरूद्ध गुन्हा दाखल करण्यात आला आहे़ घटनास्थळी उपविभागीय पोलीस अधिकारी विवेक पाटील यांनी भेट दिली़ अधिक तपास पोलीस निरीक्षक राम सोमवंशी करीत आहेत़ (वार्ताहर)