आरटीओ भोवतीच संशयाचे वलय

श्रीरामपूर : श्रीरामपूर उपप्रादेशिक परिवहन कार्यालयात झालेल्या स्वत:च्या नावे वाहन नोंदणीची कोणतीच माहिती अजूनपर्यंत नेवाशाच्या विकास घोरपडे यांना नाही. त्याने कधीतरी दिलेल्या कागदपत्रांचा वापर करून त्यांच्या नावावर टिपर नोंदणी करून तो औरंगाबादला विकण्यात आला. हा टिपर श्रीरामपूर शहर पोलिसांनी हस्तगत केला आहे. घोरपडे याच्या नावाचा गैरवापर करण्यामध्ये आरटीओचा एजंट शहाबाज शेख याचा हात असावा असा संशय पोलिसांना आहे. दरम्यान घोरपडे यांचे कागदपत्रं शेख याला मिळालीच कशी? या प्रश्नामुळे श्रीरामपूर आरटीओ कार्यालयाभोवतीच आता संशयाचे वलय निर्माण होऊ पाहत आहे. बनावट कागदपत्रांच्या आधारे श्रीरामपूर उपप्रादेशिक परिवहन कार्यालयात १३ मालमोटारीची नोंदणी करण्यात आली. हा प्रकार उघडकीस येताच उपप्रादेशिक परिवहन कार्यालयाने पोलिसांत गुन्हा दाखल केला. आरोपींमध्ये आरटीओ कार्यालयातील शहाबाज शेख या एजंटाचाही समावेश आहे. नेवासा तालुक्यातील खलाल प्रिपींच्या विकास घोरपडे यांनी कधीतरी आरटीओ कार्यालयात जमा केलेल्या कागदपत्रांचा वापर करून त्यांच्या नावावर एक टिपर नोंदविण्यात आला. तो टिपर नंतर औरंगाबाद कार्यालयांतर्गत नोंदणी करून तिकडे विक्री करण्यात आला. घोरपडे यांच्या नावाची कागदपत्रे आरटीओ कार्यालयात असताना ती एजंट शेख याला मिळालीच कशी? असा प्रश्न निर्माण झाला आहे. त्यामुळेच या बनावट नोंदणी प्रकरणात आरटीओ कार्यालयाभोवती संशयाचे वलय निर्माण झाले आहे. पोलीस निरीक्षक दिलीप पवार यांनी औरंगाबाद येथे विक्री झालेला टिपर हस्तगत केला आहे. दरम्यान पवार यांनी नेवाशाच्या घोरपडे यांच्यासंदर्भात माहिती घेतली असता स्वत:च्या नावे वाहन नोंदणी झाल्याबद्दल ते स्वत:च अनभिज्ञ असल्याचे समोर आले. यातील मुख्य आरोपी गुरूमुखसिंग संधू व एजंट शहाबाज शेख हे दोघेही फरार आहेत. त्यामुळे पोलिसांना या गुह्याचे धागेदोरे जुळविण्यात विलंब होत आहे. (प्रतिनिधी)