श्रीरामपूर - तालुक्यातील रस्ते, पाणी व इतर प्रलंबित प्रश्नांची सोडवणूक करायची असेल तर भाजपत येण्याशिवाय पर्याय नाही. त्यामुळे जनतेच्या हितासाठी भाजपत येण्याचे आवाहन विखे यांनी माजी आमदार भानुदास मुरकुटे यांना केले. गेल्या काही दिवसांपासून विखे व मुरकुटेंमधील कटुता संपली असून ते एकत्र आले आहेत.
श्रीरामपूर तालुक्यातील टाकळीभान येथे शुक्रवारी एका कार्यक्रमात विखे-मुरकुटे बोलत होते. यावेळी विखे यांनी मुरकुटे यांना भाजपात येण्याचे आवाहन केेले. त्यावर मुरकुटे यांनी माझी तालुक्यात स्वतंत्र आघाडी असल्याचे सांगितले. मात्र विखे यांनी कोणतीच आघाडी हे प्रश्न सोडवू शाकत नाही. तुम्ही भाजप पक्षप्रवेश करा, असे सांगितले. त्यामुळे मुरकुटेंच्या भूमिकेकडे लक्ष लागले आहे.
महाविकास आघाडी सरकार विकास कामांच्या प्रश्नावर अपयशी ठरले आहे. कोणत्याही कामाबाबत विचारले तर कोरोनाचे कारण पुढे केले जाते. शेतकरी अत्यंत अडचणीत असताना केवळ घोषणा केल्या. त्यांच्या खात्यावर मदतीचा एक रुपयाही अजून पोहोचलेला नाही. त्यांना वा-यावर सोडले गेले, अशी टीका विखे यांनी केली.