अहमदनगर : जातीय द्वेषातून मागासवर्गीय युवकांची हत्या होत असल्याच्या निषेधार्थ सरकारचे लक्ष वेधण्यासाठी बुधवारी रिपब्लिकन पार्टी आॅफ इंडियाच्या (गवई गट) वतीने नगर येथील डॉ.बाबासाहेब आंबेडकर यांच्या पुतळ्यासमोर अर्धनग्न आंदोलन करण्यात आले.
सदर खटला जलदगती न्यायालयात चालवून आरोपींना फाशी देण्याची मागणी यावेळी करण्यात आली. प्रारंभी मार्केटयार्ड चौकातील डॉ.बाबासाहेब आंबेडकर यांच्या पुतळ्यास पुष्पहार अर्पण करुन अभिवादन करण्यात आले. फिजीकल डिस्टन्सच्या नियमाचे पालन करुन कार्यकर्त्यांनी आंदोलनात सहभाग घेतला.
यावेळी आरपीआयचे शहराध्यक्ष सुशांत म्हस्के, दानिश शेख, पवन भिंगारदिवे, विनीत पाडळे, नईम शेख, भीम वाकचौरे, वैभव भालेराव, कार्तिक म्हस्के, सोनू गायकवाड, सोनू काळे आदी उपस्थित होते.
पुणे जिल्ह्यातील पिंपळे सौदागर येथे विराज जगताप या युवकाची प्रेमप्रकरणातून सहा जणांनी निर्घुण हत्या केली. राज्य सरकारने या प्रकरणाची त्वरीत दखल घेऊन हा खटला जलदगती न्यायालयात चालवावा. आरोपींना फाशी द्यावा, अशी मागणी आरपीआयच्या वतीने करण्यात आली आहे. मागण्यांचे निवेदन जिल्हाधिकारी कार्यालयात देण्यात आले.