जाब विचारला म्हणून मोटारसायकलस्वारावर केले वार 

कार अचानक मोटारसायकलसमोर थांबविली. त्यामुळे अपघात होता होता वाचला. याचा जाब विचारल्याने धारदार शस्त्राने वार करून मोटारसायकलस्वाराला जखमी केले.

पिंपरी : मोटारकार अचानक मोटारसायकलसमोर थांबविली. त्यामुळे अपघात होता होता वाचला. याचा जाब विचारल्याने धारदार शस्त्राने वार करून मोटारसायकलस्वाराला जखमी केले. वाल्हेकरवाडी रोड, चिंचवड येथे ही घटना घडली. याप्रकरणी चिंचवड पोलीस ठाण्यात दोन अज्ञातांविरोधात गुन्हा दाखल केला आहे.

पोलिसांनी दिलेल्या माहितीनुसार, याप्रकरणी सुनील कृष्णा कांबळे (वय २८, रा. श्रीकृष्णगनर, विठ्ठलवाडी, आकुर्डी) यांनी फिर्याद दिली आहे. फिर्यादी सुनील कांबळे सोमवारी रात्री अकराच्या सुमारास वाल्हेकरवाडी रोड, चिंचवड येथून मोटारसायकलवरून जात होते. त्यावेळी एमएच १४ एफजी २३३१ या क्रमांकाची चारचाकी मोटार त्यांच्या मोटारसायकलसमोर अचानक थांबली. त्यामुळे मोटारसायकलचा अपघात होता होता वाचला.

याबाबत फिर्यादी सुनील कांबळे यांनी चारचाकी चालकास जाब विचारला. त्यामुळे त्याने फिर्यादी सुनील कांबळे यांची कॉलर पकडून बुक्क्याने मारहाण केली. चारचाकी मोटारीतील दुसऱ्या एका आरोपीने त्याच्या हातातील धारदार शस्त्राने फिर्यादी सुनील कांबळे यांच्या उजव्या हाताच्या दंडावर व पाठीवर मारून जखमी करून धमकी दिली. चिंचवड पोलीस तपास करीत आहेत.