हॉटेलसमोर मोटार उभी केल्याच्या कारणावरून दोघांना लोखंडी रॉडने मारहाण

हाॅटेलसमाेर चारचाकी उभी करण्याच्या वादावरुन कारचालकासह त्याच्या मित्रांना वाकड येथे मारहान करण्यात आली आहे. शुल्लक कारणावरुन हाणामारीच्या घटना पिंपरी चिंचवडमध्ये सातत्याने घडत आहेत.

पिंपरी : हॉटेलसमोर मोटार उभी केल्याच्या कारणावरून मोटारचालकासह त्याच्या मित्राला बेदम मारहाण करण्यात आली. ही घटना वाकड येथील हॉटेल लिवॉर्ड समोर शुक्रवारी मध्यरात्री दीडच्या सुमारास घडली. 

ओंकार पांडुरंग पाटील (वय २७, रा. कोस्टलाईन हॉटेलजवळ, पिंपळे सौदागर, पुणे) यांनी फिर्याद दिली आहे. याप्रकरणी हॉटेल लिवॉर्डचा मालक व तीन कामगार (नाव व पत्ता माहीत नाही) यांच्यावर गुन्हा दाखल करण्यात आला आहे. पोलिसांनी दिलेली माहिती अशी, फिर्यादी ओंकार पाटील हे त्यांचे मित्र अझर बाबासाहेब मुलानी (रा. कर्वेनगर) यांच्यासह जेवणाच्या बिलाचे पैसे देण्यासाठी लिवॉर्ड हॉटेलसमोरील पानटपरीसमोर त्यांची (एमएच १६, एटी ४११७) या क्रमांकाची मोटार उभी करून एटीएममध्ये पैसे काढण्यासाठी गेले. दरम्यान, हॉटेलसमोर मोटार उभी केल्याच्या कारणावरून हॉटेलचा मालक व तीन कामगारांनी फिर्यादी पाटील यांच्या हातावर व पाठीवर लोखंडी रॉडने व काठीने मारहाण केली. तर पाटील यांच्या मित्राच्या डोक्यात रॉड मारून गंभीर जखमी केले. तसेच शिवीगाळ करून मोटारीची काच फोडून नुकसान केले. या वेळी पाटील यांची दीड तोळ्याची सोनसाखळी गहाळ झाली. याप्रकरणी वाकड पोलीस ठाण्यात गुन्हा दाखल असून, पोलीस अधिक तपास करीत आहेत.