संभाजी भिडेंना अटक करा, आंदोलनाचा इशारा

कोरेगाव भीमा दंगल प्रकरणानंतर धुळे येथील जाहीर कार्यक्रमात संविधानविरोधी वक्तव्य करणाऱ्या संभाजी भिडे यांना

मुंबई : कोरेगाव भीमा दंगल प्रकरणानंतर धुळे येथील जाहीर कार्यक्रमात संविधानविरोधी वक्तव्य करणाऱ्या संभाजी भिडे यांना तत्काळ अटक करण्याची मागणी करत भीम आर्मीने पुन्हा एकदा आक्रमक पवित्रा घेतला आहे. देशाच्या घटनेबाबत वादग्रस्त वक्तव्य करून संविधानाचा अपमान भिडे यांनी केल्याचा भीम आर्मीचा आरोप आहे. त्यामुळे त्यांना अटक केली नाही, तर तीव्र आंदोलन छेडण्याचा इशारा भीम आर्मीचे महाराष्ट्र अध्यक्ष अशोक कांबळे यांनी बुधवारी मुंबई मराठी पत्रकार संघात दिला आहे.

कांबळे म्हणाले की, भारतीय घटनेचा अपमान केल्यानंतरही सरकारकडून भिडेंवर कारवाई केली जात नाही. कोरेगाव भीमा प्रकरणातही भिडेंचे संबंध असल्याचे समोर आले आहे. तरीही सरकारकडून त्यांना पाठीशी घालण्याचे प्रयत्न सुरू आहेत. त्यात आता संविधानावर अविश्वास व्यक्त करताना घटनेचा अपमान करणारे वक्तव्य भिडे यांनी करून नव्या वादाला फोडणी दिली आहे. त्यामुळे समाजातील कायदा व सुव्यवस्था राखायची असेल, तर भिडेंना तत्काळ अटक करण्याची मागणी भीम आर्मीने केली आहे. येत्या आठवड्याभरात भिडेंना सरकारने अटक केली नाही, तर राज्यभर तीव्र आंदोलन छेडण्याचा इशारा कांबळे यांनी दिला आहे.