सुरेंद्र राऊत ल्ल यवतमाळ जिल्हा परिषदेत आपला टक्का कायम राहावा यासाठी राष्ट्रवादी काँग्रेसची नेतेमंडळी अग्रेसर आहेत. तर काँग्रसेकडून विधानसभेच्या दबावात सामोपचाराची भूमिका स्वीकारण्यात येत आहे. याच दबावात जिल्हा परिषदेत अध्यक्ष, उपाध्यक्षासह सभापतींची निवड केली जाणार आहे. शिवाय या निवड प्रक्रियेवर पंचायत समितीमध्ये झालेल्या दगाफटक्याचाही प्रभाव राहणार आहे. राष्ट्रवादीने जिल्हा परिषदेत पहिल्या अडीच वर्षात शिवसेना, भाजपला सोबत घेऊन काँग्रेसला विरोधी बाकावर बसविले होते. आताही राष्ट्रवादीने विधानसभा निवडणूक पाहून काँग्रेसची कोंडी सुरू केली आहे. आघाडी करण्याबाबतची भुमिका राष्ट्रवादीकडून आमदार संदीप बाजोरिया यांनी सरुवातीलाच स्पष्ट केली होती. अध्यक्ष पद मिळणार असेल तरच बोलणी करण्यात येईल असे, जाहीर केले होते. त्यामुळे काँग्रेसने अध्यक्षपदावर पाणी सोडूनच राष्ट्रवादीसोबत बसण्याचा निर्णय घेतल्याची शक्यता आहे. विधानसभा निवडणूकीपूर्वी काँग्रेसची नेतेमंडळी उगीच पंगा घेणार नाही, हे हेरून राष्ट्रवादीकडून व्यूहरचना आखली जात आहे. आमदार संदीप बाजोरिया यांनी आपला दबदबा कायम ठेवत अध्यक्षपदासोबतच महत्वपूर्ण खातेही राष्ट्रवादीकडेच राहावी यासाठी प्रयत्न सुरू केले आहे.यात अर्थ व बांधकाम सभापती आणि समाजकल्याण सभापतीपद घेण्यात येणार आहे. तर काँग्रेसकडे उपाध्यक्षपदासोबत शिक्षण व आरोग्य सभापती आणि महिला बालकल्याण सभापतीपद दिले जाण्याची शक्यता आहे. यामध्ये काँग्रसेकडून उपाध्यक्षपदासाठी ज्येष्ठ सदस्य बाळासाहेब मांगुळकर यांच्या नावाची चर्चा आहे. तर उर्वरित दोन सभापतीपद आर्णी आणि वणी विधानसभेत देण्याच्या हालचाली सुरू आहे. राष्ट्रवादी आणि काँग्रेसच्या आमदारांकडून जिल्हा परिषदेतील निवड प्रक्रियेच्या माध्यमातून विधानसभेतील समिकरणाची जुळवाजुळव करण्यात येत आहे. त्यामुळे एकट्या यवतमाळ विधानसभेत उपाध्यक्षासोबतच आणखी दोन सभापती पद राहणार आहे. राष्ट्रवादी बांधाकम व अर्थसभापती सुभाष ठोकळ यांचीच पून्हा वर्णी लागण्याची शक्यता आहे. समजाकल्याण सभापतीपदासाठी लता खांदवे यांच्या नावची चर्चा आहे. मात्र याबाबत दोन्ही पक्षाकडून अधिकृतरित्या काहीही सांगण्यात आले नाही. २० सप्टेंबर रोजी उमेदवार निश्चत केले जाईल असे सांगण्यात येत आहे.
विधानसभेच्या दबावात ठरणार जिल्हा परिषद पदाधिकारी
By admin | Updated: September 15, 2014 00:24 IST