आर्णी येथे युवकाचा जुन्या वादातून चाकूने भोसकून खून: ४ जणांना अटक

मृत व आरोपींमध्ये मागील काही महिन्यांपासून वाद होता. त्यांच्यात नेहमी खटके उडत होते.

राजेश कुशवाह

आर्णी (यवतमाळ) : जुन्या वादातून युवकाचा चाकूने भोसकून खून करण्यात आल्याची घटना मंगळवारी रात्री ७.४५ वाजताच्या सुमारास येथील देऊरवाडा पुनर्वसन येथे घडली. या प्रकरणी चार जणांना अटक करण्यात आली आहे. शेख समीर शेख मुश्ताक (२४) रा.शास्त्रीनगर, आर्णी असे मृताचे नाव आहे. 

याप्रकरणी पोलिसांनी शेख अजीस शे.शमी (३६), शेख अरबाज शे.रहीम (३०), जुबेर खान साहेब खान (२४) व सय्यद दानिश सय्यद जहागीर (२६) सर्व रा.देऊरवाडा पुनर्वसन, आर्णी यांना अटक केली. वृत्त लिहिस्तोवर त्यांच्यावर गुन्हा दाखल करण्याची कारवाई सुरू होती.

मृत व आरोपींमध्ये मागील काही महिन्यांपासून वाद होता. त्यांच्यात नेहमी खटके उडत होते. मृत शेख समीर शेख मुश्ताक हा मंगळवारी रात्री देऊरवाडा भागात आल्याची माहिती आरोपींना मिळाली. चौघेही एका दुचाकीने या भागात पोहोचले. त्याठिकाणी शेख समीर शेख मुश्ताक याच्यावर चाकूने वार केले. यात त्याचा जागीच मृत्यू झाला. घटनेनंतर मारेकरी पोलिस ठाण्यात दाखल झाले. त्यांना तेथे अटक करण्यात आली. मारेकऱ्यांनी या घटनेसाठी वापरलेली दुचाकी शास्त्रीनगरातील एका व्यक्तीची असल्याची माहिती आहे.