गजानन अक्कलवार - कळंब
लोकसभा निवडणुकीचे निकाल नुकतेच जाहीर झाले़ निकालापुर्वी अनेक नेत्यांनी उमेदवाराला खूष करण्यासाठी वेगवेगळ्या वल्गना केल्या़ त्यामध्ये काहिंना यश तर बहुतेकांना अपयशाचा सामना करावा लागला़ गावपुढार्यांची मतदारांनी केलेली पोलखोल तालुक्यात चर्चेचा विषय ठरत आहे. तालुक्याच्या राजकारणावर प्रभाव पाडणार्या नेत्यांना आपल्याच गावात धोबीपछाड मिळाल्याने त्यांच्या मर्यादाही यानिमीत्ताने स्पष्ट झाल्या आहेत. लोकसभेची निवडणूक काँग्रेस व राष्ट्रवादीने मिळून लढविली. मात्र राष्ट्रवादीचे पदाधिकारी तालुक्यामध्ये निवडणूकीपासून अंतर ठेवून असल्याचे दिसून आले. त्यामुळे दोन्ही पक्षात समन्वय राहिला नाही. परिणामी काँगे्रसला मागील निवडणुकीपेक्षाही पिछाडीवर जाण्याची वेळ आली. कळंब शहरामध्ये काँग्रेस पहिल्यांदाच दीड हजारांच्यावर मतांनी माघारली. त्यामुळे काँग्रेसचे तालुकाध्यक्ष तथा माजी सरपंच फारूक सिद्धिकी, जिल्हा परिषद सदस्य निलीमा गोहणे, पंचायत समिती सदस्य विजय गेडाम यांच्यावर आत्मचिंतन करण्याची वेळ आली़ कोठा येथील राष्ट्रवादीचे सुभाष पाटील कदम व काँग्रेसचे शिवशक्ती शिक्षण संस्थेचे अध्यक्ष दिनेश भोरे यांनाही मतदारांनी नाकारले. नेहमी काँग्रेसला हात देणार्या डोंगरखर्डाच्या नागरिकांनी यावेळी काँग्रेसला चांगलाच हात दाखविला. येथील काँग्रेसचे माजी पंचायत समितीचे उपसभापती गजानन पंचबुध्दे, बापूसाहेब भिसे यांना मतदानारांनी नाकारले. सावरगाव येथील जिल्हा परिषद अध्यक्ष प्रवीण देशमुख व पंचायत समितीचे माजी सभापती शशिकांत देशमुख यांनाही आपले वर्चस्व राखण्याची परंपरा कायम ठेवता आलेली नाही़ त्यामुळे राष्ट्रवादीने कोणाच्या बाजूला काम केले हा विषय संशोधनाचा ठरत आहे. बाजार समितीचे सभापती असलेले काँग्रेसचे महादेव काळे व राष्ट्रवादीचे तालुकाध्यक्ष आनंदराव जगताप यांच्या परसोडी(बु.) या गावात काँगे्रसच्या चारीमुंड्या चित झाल्या. बाजार समितीचे संचालक असलेले आष्टी येथील रमेश दाभेरे यांचाही त्यांच्याच गावात पराभव झाला़ बाजार समितीचे माजी सभापती तथा संचालक नरेंद्र मानकर यांनाही जोडमोहा या त्यांच्या गावामध्ये सपाटून मार खावा लागला़ रोजगार हमी योजनेचे माजी अध्यक्ष राजेश पोटे यांच्या उमरी या गावात तर काँग्रेस नेस्तनाबूत झाली़ पंचायत समितीचे सभापती प्रल्हाद मांडवकर यांच्या देवनळा गावात मात्र काँग्रेसला आघाडी मिळाली. नांझा येथे पंचायत समिती सदस्य वर्षा वासेकर, आदिवासी महामंडळाचे संचालक अशोक मंगाम यांना काठावर आघाडी मिळविता आली़ काँग्रेसचे तालुकाध्यक्ष मेहंदी कोठडीया यांच्या अंतरगाव या गावातही बोटावर मोजण्या इतपत का हाईना जास्तीचे मते पडली. खरेदी विक्री संघाचे उपाध्यक्ष सुदाम पवार यांच्या किन्हाळा या गावात मात्र काँग्रेसला भरभरून मतदान झाले. खरेदी विक्री संघाचे अध्यक्ष बालू पाटील दरणे व संजय गांधी निराधार योजनेचे अध्यक्ष बाबासाहेब दरणे यांची लढत मात्र बरोबरीत सुटली. तालुका समन्वय समितीचे अध्यक्ष ओमप्रकाश आचार्य यांच्या बुथवर काँग्रेसला थोडी आघाडी घेता आली. एकंदरीत बहुतेक गावात काँग्रेसला सपाटून मार बसला. त्यामुळे येणार्या निवडणुका लक्षात घेता काँग्रेस व राष्ट्रवादीवर आत्मचिंतन करण्याची वेळ आली आहे.