विशाल सोनटक्के
त्रिवेंद्रम : भारतातील पहिली बोट रेस आणि जगातील सर्वांत मोठी जल क्रीडा स्पर्धा अशी ओळख असलेल्या केरळ चॅम्पियन बोट लीग स्पर्धेची अंतिम फेरी आज, शनिवारी केरळमधील कोल्लम येथील प्रसिद्ध प्रेसिडेंट ट्राॅफी बोट रेसवर रंगणार आहे. या स्पर्धेची संपूर्ण केरळमध्ये मोठी उत्सुकता असून, बोट रेसच्या देश-विदेशांतील चाहत्यांनीही कोल्लम येथे गर्दी केली आहे.
पावसाळ्यानंतर तीन महिन्यांच्या कालावधीसाठी दरवर्षी केरळचा शांत बॅक वाॅटर बदललेला असतो, कारण येथे ही स्पर्धा इंडियन प्रीमिअर लीगच्या धर्तीवर रंगलेली असते. यंदा या स्पर्धेसाठी अभूतपूर्व उत्साह आहे. कारण कोविडमुळे दोन वर्षांच्या कालावधीनंतर ही स्पर्धा रंगते आहे. या स्पर्धेच्या १२ पैकी ११ वीकेंड शर्यती संपल्या असून, अंतिम सामना आज, शनिवारी नेहरू बोट रेस येथे सुरू होत आहे. एकूण सात कोटींचे बक्षीस असलेल्या या स्पर्धेमध्ये ट्राॅपिक टायटल ८८ गुणांसह पहिल्या स्थानावर आहे, तर मायटी बाेर्स दुसऱ्या, रॅंगिग रोवर्स तिसऱ्या स्थानावरून असून, विविध भागातील नऊ संघही २०२२ बोट लीग जिंकण्यासाठी झुंज देणार आहेत.
स्पर्धेचा ट्रॅक साधारण एक किलोमीटर लांबीचा असून, ही बोट स्पर्धा केरळच्या शेती संस्कृतीचा अविभाज्य भाग समजला जातो. या स्पर्धेमुळे केरळच्या पर्यटनालाही मोठ्या प्रमाणात चालना मिळाली असून, नागरिकांत स्पर्धेमुळे सामाजिक एकोप्याची भावना निर्माण झाली आहे. या सीबीएल स्पर्धेमुळे एखाद्या पारंपरिक सणासारखे वातावरण बँक वाॅटरच्या काठावर निर्माण झाले असून, रोव्हिंगचे कौशल्य आणि अचूक समन्वय याची अनुभूती घेण्यासाठी केरळकर नागरिक सज्ज झाले आहेत.
नऊ चॅम्पियन स्नेक बाेटिंगकडे लक्ष
चॅम्पियन बोट लीग २०२२ या स्पर्धेला ४ सप्टेंबरला प्रारंभ झाला असून, आज, शनिवारी अंतिम सामना होत आहे. साधारण २८०० रोअर्स या स्पर्धेत सहभागी झाले होते. साधारणपणे एका बोटीमध्ये ९५ रोअर्स असतात. तर ७ ते १० स्टॅन्डी असतात. स्पर्धेचा एक किमीचा ट्रॅक कोणती बोट सर्वांत कमी वेळेत पूर्ण करते, यावर विजेता ठरतो.