शिवसेना नेत्याची सात लाखांनी फसवणूक

अमरावतीच्या युवकाने यवतमाळ जिल्ह्याच्या आर्णी येथील शिवसेनेचे नगरपरिषदेतील विरोधी पक्षनेते प्रवीण मुनगीनवारसह पाच जणांची सात लाख रुपयांनी फसवणूक केली आहे.

यवतमाळ : अमरावतीच्या युवकाने यवतमाळ जिल्ह्याच्या आर्णी येथील शिवसेनेचे नगरपरिषदेतील विरोधी पक्षनेते प्रवीण मुनगीनवारसह पाच जणांची सात लाख रुपयांनी फसवणूक केली आहे. प्रथम श्रेणी न्यायाधीश उमेशचंद्र मोरे यांच्या आदेशावरून आर्णी पोलिसांनी भादंवि ४०६, ४२०, ३४ कलमाखाली गुन्हा नोंदविला आहे. या प्रकरणात दिनेश श्रीरंग खांडरे (३८) रा.परमार अपार्टमेंट सातुर्णा अमरावती व पांडुरंग एन. कदम (४०) रा.देवगड नांदेड या दोघांना आरोपी बनविण्यात आले आहे. आर्णीतील शिवसेनेचे नगरसेवक प्रवीण वामन मुनगीनवार (४०) व अन्य चौघांची याप्रकरणात फसवणूक झाली आहे. दिनेश व पांडुरंग हे काही दिवसांपूर्वी आर्णीला आले होते. त्यांनी आॅडिओ डॉट कॉम या कंपनीमध्ये पैसे गुंतविल्यास मोबाईलवर दररोज येणाऱ्या जाहिरातीतून नियमित कमाई सुरू होईल, असे आमिष दाखविले. या आमिषाला प्रवीण व त्यांचे सहकारी बळी पडले. या गुंतवणुकीसाठी आयसीआयसीआय बँकेचा खाते क्रमांक १४७५०५५००२१४ देण्यात आला होता. ठरल्यानुसार प्रवीण व सहकाऱ्यांनी सात लाख रुपयांची रक्कम या खात्यात टाकली. मात्र त्यानंतर हे खातेच बंद करण्यात आले. फसवणूक झाल्याचे लक्षात आल्यानंतर त्यांनी गुन्हा दाखल व्हावा म्हणून धडपड केली. पोलिसांनी प्रतिसाद न दिल्याने न्यायालयात धाव घेण्यात आली. अखेर न्यायालयाच्या आदेशावरून गुन्हा नोंदविला गेला. (प्रतिनिधी)