राजूदास जाधव यांच्या सहकार पॅनलला १३ जागा

जिल्हा परिषद कर्मचारी व शिक्षक सहकारी पतसंस्थेच्या सार्वत्रिक निवडणुकीत राजूदास जाधव यांच्या नेतृत्वातील

 यवतमाळ : जिल्हा परिषद कर्मचारी व शिक्षक सहकारी पतसंस्थेच्या सार्वत्रिक निवडणुकीत राजूदास जाधव यांच्या नेतृत्वातील सहकार पॅनलने १७ पैकी सर्वाधिक १३ जागा पटकावून आपले वर्चस्व सिद्ध केले. विरोधी महासमन्वय पॅनलला चारच जागांवर विजय मिळविता आला. वृत्तलिहेस्तोवर विजयी उमेदवारांची अधिकृत घोषणा करण्यात आलेली नव्हती. काही जागांवर फेरमतमोजणी सुरू होती. या निवडणुकीत सात हजार ७१२ पैकी सात हजार ११ मतदारांनी आपला हक्क बजावला होता. रविवारी हे मतदान घेण्यात आले. सोमवारी सकाळी येथील दारव्हा रोड स्थित गुरुदेव मंगल कार्यालयात मतमोजणीला प्रारंभ झाला. सहकार पॅनलचे प्रमुख राजूदास जाधव यांच्या नेतृत्वात तर महासमन्वय पॅनलचे मधुकर काठोळे यांच्या नेतृत्वात ही निवडणूक चांगलीच चुरशीची झाली. मतदानाच्या दिवशी एखाद्या ग्रामपंचायतीच्या सार्वत्रिक निवडणुकीसारखे वातावरण होते. प्रत्येक मत मिळविण्यासाठी दोनही पॅनलकडून धडपड शेवटच्या क्षणापर्यंत सुरू होती. त्यामुळेच ९१ टक्के इतके विक्रमी मतदान झाले. सहकारचे १३ उमेदवार विजयी झाल्याची माहिती पॅनल प्रमुख राजूदास जाधव यांनी दिली. महासमन्वयचे चार उमेदवार विजयी झाल्याचे मधुकर काठोळे यांनी सांगितले. (कार्यालय प्रतिनिधी) सहकार पॅनलचे विजयी उमेदवार ४राजूदास जाधव, डॉ. दिलीप चौधरी, दीपक दोडके, एकनाथ गाडगे, अनिल जयसिंगपुरे, चित्तरंजन कडू, गौतम कांबळे, राजेंद्र पिंपळशेंडे, प्रवीण राणे, राजेंद्र ठाकरे, नंदेश चव्हाण, मारोती आत्राम, नंदा चाटे.महासमन्वय पॅनलचे विजयी उमेदवार ४मधुकर काठोळे, सुचिता बोंद्रे, मुकेश भोयर, संजय गावंडे.