विनोद ताजने ल्ल वणी
शाळांना दीड महिन्याच्या उन्हाळी सुट्या लागल्या आणि शिक्षक आमदारांच्या प्रचारालाही दीड महिन्याचा ब्रेक लागला़ तरीही सतत संपर्कात राहण्यासाठी मतदारांचे भ्रमणध्वनी क्रमांक इच्छुक उमेदवारांनी मिळवून त्याद्वारे संदेश पाठवून मतदारांना सतावून सोडले जात आहे़ मात्र यावेळी शिक्षक मतदार संघाच्या निवडणुकीत शिक्षकांपेक्षा इतरांची व राजकीय पक्षांची ढवळाढवळ अधिक होत असल्याने निवडणुकीला राजकीय रंग चढण्याची शक्यता आहे़ महाराष्ट्र विधानपरिषदेच्या अमरावती शिक्षक मतदार संघाची निवडणूक येत्या जुलै महिन्यात होत आहे़ त्यासाठी अनेकांनी गुडघ्याला बाशिंग बांधून घेतले आहे़
कधीकाळी शिक्षक व शिक्षक संघटना नावापुरतीच मर्यादीत असलेली ही निवडणूक आता राजकारण्यांनाही खुणावू लागली आहे़ इच्छुक उमेदवारांची प्रचाराची एक फेरी पूर्णही झाली आहे़ उमेदवाराला शाळा सुरू असताना प्रचार करणे सोपे गेले़ एका शाळेला भेट दिली असता किमान दहा व कमाल १०० मतदाराशी संपर्क साधता येत होता़ मात्र आता शाळांना सुट्या लागल्याने शिक्षक एका ठिकाणी मिळणे कठीण झाले आहे़ शाळेच्या मुख्यालयी राहणारे शिक्षकही अत्यल्पच आहे़ त्यामुळे एका-एका शिक्षकाच्या घरी जाऊन भेट घेणे, हे इच्छुक उमेदवारांना परवडणारे नाही़ त्यामुळे आता २६ जूनला शाळा सुरू झाल्यानंतरच उमेदवारांची घोडदौड सुरू होणार आहे. त्यावेळी त्यांच्या हातात केवळ १५ दिवस राहणार आहे. त्यामुळे १५ दिवसात पाच जिल्ह्यातील प्रत्येक शिक्षक मतदाराशी भेट होणे शक्य नाही़ परिणामी स्थानिक कार्यकर्त्यांवरच मतदानाची मदार राहणार आहे़
सन २००९ मध्ये झालेल्या निवडणुकीत १९ उमेदवार रिंगणात होते़ त्यावेळी दुसर्‍या पसंतीच्या मतांनी विजय मिळाला होता. यावेळी आतापर्यंत अकरा जणांनी आपली उमेदवारी जाहीर करून प्रचाराचा पहिला टप्पा पूर्ण केला आहे़ या निवडणुकीत प्रत्येक वेळी शिवाजी शिक्षण संस्थेची व विदर्भ माध्यमिक शिक्षण संघाची भूमिका निर्णायक ठरली आहे. मात्र यावेळी तीन उमेदवार रिंगणात राहणार असल्याने शिवाजी शिक्षण संस्थेचे मतदार पसंतीक्रम कसा ठरवतात, यावरच निवडणुकीचे चित्र ठरणार आहे़ विदर्भ माध्यमिक शिक्षक संघाचे दोन उमेदवार एकमेकांसमोर उभे ठाकणार आहे़ त्यामुळे संघटनेच्या मतांचेही विभाजन अटळ आहे़ शिक्षक परिषदेमध्येही नाराजीचा उद्रेक होण्याची शक्यता आहे़ यावेळीही पहिल्या पसंतीच्या मताने कुणी निवडून येण्याची शक्यता कमीच आहे. दुसर्‍या पसंतीची मते यावेळीही बहुमोल ठरणारी आहे़ मात्र शिक्षक आमदार हा शिक्षकच असावा, असा सूर शिक्षक मतदारांमधून निघत आहे़ त्यामुळे यावेळी कोणत्या शिक्षकाचे नशीब फळफळणार, हे निवडणुकीनंतरच समजून येणार आहे़