लोकमत न्यूज नेटवर्क यवतमाळ : जिल्ह्यातील दिग्रस शहरातील मानोरा चौककडे जाणाऱ्या रस्त्यावरील जीवन प्राधिकरणाच्या जलवाहिनीचा एअर कॉक अचानक निसटला . यामुळे जलवाहिनी सिमेंट खांबातील पाइप मधून जवळपास ३० फूट उच्च पाण्याचे फवारे उडत होते. त्यामुळे नागरिकांची एकच तारांबळ उडाली. दिग्रस शहराच्या लगतच असलेल्या अरूणावती धरणावरून मानोरासह तालुक्यातील २८ गावांना जलवाहिनीद्वारे पाणीपुरवठा केला जातो.
जवळपास ३० फुट उंच हा फवारा सुरू आहे. हा फवारा इतका उंच की जलवाहिनीच्या वरून जाणाऱ्या विद्युत तारांना स्पर्श करत होता. त्यामुळे रस्त्यावरून ये-जा करणाऱ्या वाहनधारकांना, तसेच जवळच असणाऱ्या दुकानदारांच्या मनात काही काळ भीतीचे वातावरण निर्माण झाले होते. परंतु विद्युत प्रवाह बंद करण्यात आल्याने मोठा अनर्थ टळला. या घटनेमुळे लाखो लिटर पाण्याचा अपव्यय झाला .