तोडगा निघाला : बेमुदत बंदही मागे, नेत्यांची यशस्वी मध्यस्थीउमरखेड (कुपटी) : दगडफेक करणाऱ्या आरोपींना अटक आणि गणेश भक्तांवरील गुन्हे मागे घेण्याच्या मागणीसाठी शहरातील गणेश विसर्जन न करण्याचा निर्णय घेण्यात आला होता. शेवटी पोलीस प्रशासनाने आरोपींना अटक करण्याचे आश्वासन दिल्याने शहरात गणरायाचे विसर्जन करण्यात आले. तसेच तीन दिवसांपासून सुरू असलेला बंद ही मागे घेण्यात आला. उमरखेड येथे गणेश स्थापनेच्या मिरवणुकीवर दगडफेक करण्यात आली होती. त्यामध्ये परस्पर विरोधी तक्रारीवरून उमरखेड पोलिसांनी गुन्हे दाखल केले होते. तक्रारीनुसार संबंधित आरोपीस अटक न केल्याने तीन दिवस शहरातील बाजारपेठ बंद ठेवण्यात आली होती. तसेच गणेश विसर्जन न करण्याचाही निर्णय घेतला होता. यामुळे शहरात तणाव सदृश्य वातावरण निर्माण झाले होते. तोडगा काढण्यासाठी आमदार संजय राठोड, आमदार विजय खडसे, माजी खासदार सुभाष वानखडे, औदुंबर गणेश उत्सव समितीचे अध्यक्ष अ‍ॅड़ संजय जाधव, नितीन भुतडा, रमेश चव्हाण, माजी आमदार प्रकाश देवसरकर, व्यापारी संघटनेचे नारायण भट्टड, राजू जयस्वाल, सुरेश माहेश्वरी, नंदकिशोर अग्रवाल, पप्पू जयस्वाल यांनी पुढाकार घेतला. प्रशासनासोबत चर्चा करून तोडगा काढण्यात आला. विसर्जन होताच आरोपींना अटक करण्याचे आश्वासन पोलिसांनी दिले. त्यामुळे बंद मागे घेऊन गणेशाचे विसर्जन केले. यावेळी जिल्हाधिकारी राहूलरंजन महिवाल, पोलिस अधीक्षक संजय दराडे, अपर पोलीस अधीक्षक जानकीराम डाखोरे, उपविभागीय अधिकारी दीपक सिंगला, उपविभागीय पोलीस अधिकारी डॉ. अश्विनी पाटील, तहसीलदार सचिन शेजाळ उपस्थित होते. पोलिसांचा चोख बंदोबस्त होता. (वार्ताहर)
अखेर उमरखेडमध्ये गणेश विसर्जन
By admin | Updated: September 9, 2014 23:59 IST