पोफाळीची घटना : उमरखेडच्या शासकीय रुग्णालयात उपचार पोफाळी : राष्ट्रीय जंतनाशक दिनानिमित्त जंतनाशक गोळ्या खाल्ल्यानंतर आठ विद्यार्थ्यांची प्रकृती बिघडल्याची घटना उमरखेड तालुक्यातील पोफाळी येथील जिल्हा परिषद शाळेत बुधवारी घडली. उपचारासाठी या विद्यार्थ्यांना उमरखेडच्या शासकीय रुग्णालयात दाखल करण्यात आले आहे. श्रेया कनवाळे (१०), आफरीन शेख (७), रेहान शेख अखील (७), अनिराज डांगे (७), श्रेया नाईक (७), सुमंत पंडागळे (७), यश ठवरे (८), सृष्टी विश्वंभरे (८) असे प्रकृती बिघडलेल्या विद्यार्थ्यांचे नाव आहे. या सर्व विद्यार्थ्यांची प्रकृती धोक्याबाहेर असल्याचे डॉक्टरांनी सांगितले. पोफाळी येथील जिल्हा परिषद शाळेतील विद्यार्थ्यांना अल्बेंब्डाझोल ४०० एमजी गोळीचे वाटप करण्यात आले. गोळ्या सेवन केल्यानंतर शाळेतील काही विद्यार्थ्यांना अचानक मळमळ व उलटी सुरू झाली. त्यामुळे शिक्षकांनी धावपळ करून या विद्यार्थ्यांना उमरखेडच्या शासकीय रुग्णालयात दाखल केले. ही घटना पालकांना माहीत होताच अनेक पालकांनी उमरखेडकडे धाव घेतली. मुख्याध्यापक एन.डी. येडतकर, शिक्षक ओ.एन. मंठाले, एन.आर. दुधे, सागर पेंशनवार, एस.आर. दुधे, एल.बी. मास्ट यांनी विद्यार्थ्यांना तत्काळ रुग्णालयात दाखल केले. दरम्यान तालुका आरोग्य अधिकारी डॉ. आशिष पवार यांच्याशी संपर्क साधला असता, जेवण केल्यानंतर गोळ्या घेतल्यास मळमळ जाणवते. या विद्यार्थ्यांवर योग्य उपचार करून सुटी देण्यात आली. चिंता करण्याचे कारण नसल्याचे डॉ. पवार यांनी सांगितले. (वार्ताहर)
जंतनाशक गोळ्या खाल्ल्याने आठ विद्यार्थ्यांची प्रकृती बिघडली
By admin | Updated: February 11, 2016 02:47 IST