सभापती निवडी संदर्भात संचालकांची तीव्र नाराजी

कृषी उत्पन्न बाजार समितीच्या सभापती पदासाठी राष्ट्रवादीचे ज्येष्ठ नेते व विद्यमान आमदार यांनी सुचविलेल्या नावाला विरोध दर्शवून संचालकांनी...

आदेश झुगारला : कृषी उत्पन्न बाजार समितीची बैठक पुन्हा रद्दपुसद : कृषी उत्पन्न बाजार समितीच्या सभापती पदासाठी राष्ट्रवादीचे ज्येष्ठ नेते व विद्यमान आमदार यांनी सुचविलेल्या नावाला विरोध दर्शवून संचालकांनी सभापती निवडीच्या बैठकीला खो दिल्याने कोरम अभावी अखेरिस बैठक विसर्जित करावी लागली. कृषी उत्पन्न बाजार समितीच्या संचालक पदाच्या रिक्त जागेवर नवीन संचालकाची निवड तसेच सभापती पदाच्या निवडीसाठी जिल्हा सहाय्यक निबंधकाकडून १४ आॅगस्ट ही तारीख निश्चित करण्यात आली होती. शुक्रवारी सकाळी ११ वाजता आमदार मनोहर नाईक यांनी बाजार समितीला भेट दिली. यावेळी त्यांनी परिसरातील अतिक्रमण केलेल्या दुकानांची पाहणी केली. त्यांच्यासोबत पुसद जिनिंग प्रेसिंगचे अध्यक्ष विजय चव्हान, यवतमाळ जिल्हा बँकेचे रिजनल अध्यक्ष आर.डी.राठोड होते. संचालक व सभापती पदासाठी नाईक यांनी एक नाव सुचविले होते. तसा निरोप सर्व संचालकांना कळविण्यात आला. निवडीसाठी बैठक बारा वाजताच्या सुमारास सुरू झाली. सहाय्यक निबंधक जी.एन.नाईक यांच्या अध्यक्षतेत बैठक सुरू झाली. या बैठकीला बाजार समितीच्या १४ संचालकांपैकी केवळ तीन संचालक उपस्थित होते. अखेर सभाअध्यक्षांनी कोरमअभावी सभा तहकूब केली. उल्लेखनिय म्हणजे निवड बैठक तहकूब केली त्यावेळी बाजार समितीच्या परिसरात आठ ते दहा संचालक उपस्थित होते. परंतु त्यांनी एकप्रकारे नेत्यांनी सुचविलेल्या नावाला विरोध दर्शवित बैठकीवर बहिष्कार टाकला. याबाबत सदर प्रतिनिधीने बाजार समितीच्या उपसभापती आणि सहसंचालकांना याबाबत विचारणा केली असता प्रत्येकजण कोरमअभावी सभा तहकूब केल्याचेच सांगत होता. यावेळी समिती सचिवाच्या कक्षात उपसभापतींसह सहा संचालक उपस्थित होते. तर तीन संचालक कार्यालय परिसरात होते. बैठकीला तीन सदस्य कोण हजर होते, त्यांची नावे सांगण्यास कुणीही तयार नव्हते. अखेर एका संचालकाने नाव न छापण्याच्या अटीवर आमचे नेते आमदार नाईक यांनी दिलीप बेंडे पाटील यांचे नाव सुचविल्याचा निरोप विजय चव्हाण व आर.डी. राठोड यांच्यामार्फत पाठविला. संचालकपदी बेंडे पाटलांच्या नावाला आमचा विरोध नव्हता, परंतु एका नव्या संचालकाला तत्काळ सभापती पदावर आरुढ करण्यासाठी संचालकांचा विरोध होता. सभापती हा जुन्या संचालकांपैकी झाला पाहिजे, असा आमचा आग्रह होता, असे हा संचालक म्हणाला. त्या अनुषंगाने १४ संचालकांपैकी विठ्ठल राठोड, बळीराम चव्हान व चंद्रशेखर नाईक हे तिघेच सभेला उपस्थित होते. एक संचालक या बैठकीसाठी नागपूर येथून स्वत:चे काम बाजूला सारून आले होते तर एक संचालक नांदेडचा दौरा सोडून उपस्थित होते. परंतु बैठक न झाल्यामुळे त्यांचा हिरमोड झाला. यापूर्वी सहा आॅगस्टला संचालक व सभापती निवडीची सभा निर्धारित करण्यात आली होती. आता नवीन तारखेच्या प्रतिक्षेत सर्वजण आहेत. सहकार क्षेत्रात किमान तालुक्यात तरी आजवर मनोहर नाईक यांचा शब्द पडत नव्हता. परंतु आजच्या बैठकीत भाऊंनी सुचविलेल्या नावाला विरोध झाला, ही चर्चा संपूर्ण तालुक्यात आहे. संचालकांनी आमदार मनोहर नाईक यांनी सुचविलेल्या नावाला विरोध दर्शवून सभेवर सामूहिक बहिष्कार टाकला. याचा अर्थ भाऊंचा प्रभाव ओसरत तर चालला नाही ना, असा सूर सर्वसामान्यांमधून उमटू लागला आहे. (तालुका प्रतिनिधी)