गजानन अक्कलवारलोकमत न्यूज नेटवर्कयवतमाळ : संचारबंदीत चौकशीसाठी जागोजागी थांबविलेल्या वाहनातील आजारी बालकाचा मृत्यू झाल्याची घटना शुक्रवारी सकाळी ११ वाजताच्या सुमारास घडली. रोहित अनिल सोळंके (दोन वर्षे) रा. माथावस्ती कळंब, असे या बालकाचे नाव आहे. एकुलता एक मुलगा दगावल्याच्या धसक्याने आई-वडिलांनाही कळंब ग्रामीण रुग्णालयात दाखल करण्यात आले आहे.मागील आठ दिवसांपासून रोहितची प्रकृती ठीक नव्हती. शुक्रवारी सकाळी १० वाजता आणखी खराब झाली. रोहितला यवतमाळ येथे रुग्णालयात नेण्यासाठी वसाहतीमधीलच जीवन जवळकर यांची गाडी भाड्याने करण्यात आली. यवतमाळ येथे डॉ. विनायक कुळकर्णी यांच्या रुग्णालयात जाताना ही गाडी यवतमाळ येथे पांढरकवडा बायपासवर पोलिसांनी अडविले. रुग्ण असल्याचे सांगितल्याने गाडी तत्काळ सोडण्यात आली. पुढे शारदा चौकात अडविली. तेथे पोलिसांना गयावया करण्यात आली. येथेही आठ ते दहा मिनिट गेले.तेथून निघाल्यानंतर अवधुतवाडी पोलीस ठाण्याजवळ अडविण्यात आहे. याठिकाणी एक महिला पोलीस कर्मचारी व इतरांनी बरीच विचारपूस केली. एवढेच नाही तर, दवाखान्याचे कागदपत्रही मागितले. या तपासणीत जवळपास दहा मिनिटांचा वेळ गेला. रुग्णालयात पोहोचल्यानंतर रोहित मृत झाल्याचे डॉक्टरांनी घोषित केले. दहा-पंधरा मिनिटे आधी आणले असते तर, उपचार करता आला असता, असे डॉक्टरांनी म्हणताच आई-वडिलांनी हंबरडा फोडला. रोहितचे कलेवर कळंब येथे आणण्यात आले. मोजक्या नातेवाईकांच्या उपस्थित त्याच्यावर अंत्यसंस्कार करण्यात आले. पोलिसांनी चौकशीत वेळ घालवल्यानेच रोहित दगावल्याचा आरोप कुटुंबीयांकडून केला जात आहे.रुग्णांसाठी रस्ता मोकळा असावा - चालककोरोनामुळे सर्वत्र बंदोबस्त आहे. ही गोष्ट आवश्यक असली तरी, रुग्णांना तत्काळ रस्ता मोकळा करुन देणे आवश्यक आहे. आज एका बालकाचा वेळेवर उपचाराअभावी मृत्यू झाला. यापुढे असा प्रकार होऊ नये, अशी प्रतिक्रिया चालक जीवन जऊळकर यांनी दिली. विशेष म्हणजे या सर्व प्रकाराचा व्हीडीओ जीवन जऊळकर यांनी समाज माध्यमावर पोस्ट केला.धक्का बसला- धनराज सोळंकेआमच्या घरातील एकुलता एक मुलगा गेल्याने मोठा धक्का बसला. वेळेवर उपचार मिळाले असते तर कदाचिच रोहित वाचला असता. परंतु त्याला उपचार मिळवून देण्यात आम्ही कमी पडलो, अशी हताश प्रतिक्रिया रोहितचे काका धनराज सोळंके यांनी दिली.एसीपींनी मागितला अहवालदरम्यान, या सर्व प्रकरणाची माहिती जिल्हा पोलीस अधीक्षक एम. राज कुमार यांनी संबंधित पोलिसांकडून मागितली आहे. कळंबचे ठाणेदार विजय राठोड यांनाही यासंबंधीचा अहवाल सादर करण्याचे निर्देश देण्यात आले.अशी कोणतीही घटना घडली नाही. चालकाने सांगितलेल्या ठिकाणांचे सीसीटीव्ही कॅमेरे तपासण्यात आले आहे. चालकालाही चौकशीसाठी यवतमाळला पाचारण करण्यात आले. त्याची चौकशी केली जात आहे.- प्रदीप शिरस्करपोलीस निरीक्षक, स्थानिक गुन्हे शाखा यवतमाळ.