(यवतमाळ) : दुचाकीला मागून आलेल्या दुचाकीने धडक दिल्याने झालेल्या अपघातात एका युवकाचा मृत्यू झाला, तर तीन जण जखमी झाले. ही घटना रविवारी रात्री ७:३० वाजेच्या सुमारास अमरावती मार्गावर असलेल्या चिचबर्डी नजीकच्या रेल्वे क्रॉसिंगजवळ घडली. दुर्गादास हरिदास कांबळे (३०) रा.उत्तरवाढोणा, ता,नेर, असे मृताचे नाव आहे. लिफ्ट मागणे या युवकाचा जिवावर बेतले.
यवतमाळ येथून एमएच २९-बीबी १६१२ क्रमांकाची दुचाकी नेरकडे जात होती. या दुचाकीचा चालक देवानंद दोनाडकर (३६) रा.टोलीपुरा (नेर) यांना दुर्गादास याने लिफ्ट मागितली. चिचबर्डी गावाजवळ त्यांच्या दुचाकीला मागून यवतमाळहून आलेल्या एमएच २९ - एबी ७१५४ या क्रमांकाच्या भरधाव दुचाकीची जोरदार धडक बसली.
या घटनेत देवानंद दोनाडकर, दुर्गादास कांबळे आणि धडक देणाऱ्या दुचाकीवरील अरविंद पवार (२३), उदय आडे (२७) रा.दोघेही सोनवाढोणा हे चार जण जखमी झाले. माहिती होताच नागरिकांनी घटनास्थळाकडे धाव घेतली. जखमींना यवतमाळ येथील शासकीय रुग्णालयात दाखल करण्यात आले. उपचारादरम्यान दुर्गादास कांबळे याचा मृत्यू झाला.
दुर्गादास हा यवतमाळ येथे इलेक्ट्रिकची कामे करत होता. त्याची नेहमी यवतमाळ येथे ये-जा सुरू राहायची. अनेकदा तो लिफ्ट मागून गावी जायचा. रविवारी मात्र त्याच्याशी घात झाला. तो आईवडिलांना एकुलता एक मुलगा आणि घरातील कर्ता पुरुष होता.