मंगळवार अपघात वार

जिल्ह्यात विविध चार ठिकाणी ठिकाणी झालेल्या रस्ता अपघातात तीन जण ठार झाले. तर १४ जण गंभीर जखमी झाले.

चार घटना : तिघांचा मृत्यू, महिलांसह १४ प्रवासी गंभीर जखमी यवतमाळ : जिल्ह्यात विविध चार ठिकाणी ठिकाणी झालेल्या रस्ता अपघातात तीन जण ठार झाले. तर १४ जण गंभीर जखमी झाले. उमरखेड तालुक्यात चिल्ली येथे दोन जण ठार, पांढरकवडा तालुक्यातील सुन्नी येथे एक जण ठार तर बाभूळगाव तालुक्यातील थाळेगाव फाट्याजवळ अपघातात नऊ महिला तर आर्णी तालुक्यातील दाभडी येथे दोन तरुण गंभीर जखमी झाले. जिल्ह्यासाठी मंगळवार हा जणू अपघातवारच ठरला. नागपूर-बोरी-तुळजापूर राष्ट्रीय महामार्गावरील चिल्ली गावाजवळ सोमवारी रात्री ९.३० वाजता दुचाकीला भरधाव बोलेरो जीपने धडक दिली. या अपघातात अशोक बाबूराव खराटे (२०), ज्ञानेश्वर बालाजी खराटे (२२) दोघे रा. जनुना ता. उमरखेड हे ठार झाले तर मोतीराम सीताराम कांबळे गंभीर जखमी झाला. हे तिघेही सोमवारी रात्री दुचाकीने जात असताना बोलेरो जीपने दुचाकीला धडक दिली. तिघेही जण रक्ताच्या थारोळ्यात पडले. याची माहिती उमरखेड पोलिसांना होताच घटनास्थळ गाठले. अशोक खराटे हा जागीच ठार झाला होता. तर गंभीर जखमी ज्ञानेश्वरचा मृत्यू उपचारासाठी नेत असताना झाला. तिसरा जखमी मोतीराम कांबळे याच्यावर नांदेड येथील रुग्णालयात उपचार सुरू आहे. बोलेरो चालक विजय चौधरी याच्याविरुद्ध गुन्हा दाखल करण्यात आला आहे. दुसरा अपघात राष्ट्रीय महामार्गावरील पांढरकवडा तालुक्यातील सुन्ना गावाजवळ मंगळवारी सकाळी १० वाजताच्या सुमारास घडला. ट्रकने दुचाकीला धडक दिल्याने शेख गफ्फूर शेख इमाम (५५) रा. लिंगटी ता. झरी हे ठार झाले. तर बाबाराव तानबा उईके (४०) व नामदेव छत्रपती राऊत (५५) गंभीर जखमी झाले. ते तिघे जण न्यायालयात तारखेसाठी जात होते. त्यावेळी सुन्ना गावाजवळ ट्रक क्र. ए.के.२५-बी-७८०० ने जबर धडक दिली. तिसरा अपघात आर्णी तालुक्यातील दाभडी गावाजवळ घडला. परस्पर विरुद्ध दिशेने येणाऱ्या दोन मोटरसायकली एकमेकांवर आदळल्याने गजानन शंकर राठोड (३५) रा. पांगरी आणि मिलिंद दत्ता वानखडे (३०) रा. दाभडी गंभीर जखमी झाले. जखमींना यवतमाळच्या शासकीय रुग्णालयात दाखल करण्यात आले आहे. (लोकमत चमू)महिलांना घेऊन जाणाऱ्या मिनीडोअरला धडक भरधाव ट्रकने मिनीडोअरला जबर धडक दिल्याने झालेल्या अपघातात नऊ महिला जखमी झाल्या. ही घटना मंगळवारी दुपारी बाभूळगाव तालुक्यातील थाळेगाव (मिटनापूर) फाट्याजवळ घडली. चौघींची प्रकृती गंभीर असून त्यांना यवतमाळला उपचारार्थ दाखल करण्यात आले आहे.बाभूळगाववरून रेती भरुन अमरावतीकडे जाणाऱ्या ट्रक एम.एच.२७-एक्स-२३३६ ने मिनीडोअर एम.एच.२९-एम-६८२८ ला जबर धडक दिली. यात बेबीबाई अशोक भेंडारकर (४२), शोभाताई सुधाकर विरखेडे (४०), माया दीपक ठाकरे (४५), रेणुका अरविंद नेहारे (३५) सर्व रा. बारड ता. बाभूळगाव असे गंभीर जखमीचे नावे आहेत. त्यांच्यावर यवतमाळच्या रुग्णालयात उपचार सुरु आहे. तर शेवंताबाई नेहारे (६२), प्रभाताई महल्ले (६५), अनुसया येटरे (६०), शोभाताई भेंडारकर (५०), शोभाबाई ठाकरे (५५) सर्व रा. बारड जखमी झाले असून त्यांच्यावर बाभूळगाव ग्रामीण रुग्णालयात उपचार सुरू आहे. घटनास्थळावरील नागरिकांनी सर्व जखमींना मिनीडोअर बाहेर काढून तत्काळ रुग्णालयात हलविले. या प्रकरणी ट्रक चालक मंगेश गुलाबराव सोनोने (२८) रा. वडाळी अमरावती याला अटक करून गुन्हा नोंदविला.