-----
पाणंद रस्त्याची दुरवस्था
वाशिम : कामरगाव परिसरातील काही पाणंद रस्त्यांची अवस्था वाईट आहे. त्यात गत आठवड्यात आलेल्या जोरदार पावसामुळे या रस्त्यांवर मोठमोठ्या नाल्याच तयार झाल्याने या भागातील शेतकऱ्यांची वहिवाटच बंद पडली आहे.
-----------
पीक पाहणी कार्यक्रम
वाशिम : तालुक्यात कृषी विभागामार्फत क्रॉपसॅप प्रकल्पांतर्गत पिकावरील कीड व रोग याबाबत निरीक्षणे घेतली जातात. आता या मोहिमेला सुरुवात करण्यात आली असून, काही गावांना मंगळवारी भेटी देऊन कृषी विभागाने पीक पाहणी केली. यावेळी शेतकऱ्यांना मार्गदर्शन करण्यात आले.
-------
२८ वाहनांवर दंडात्मक कारवाई
दगड उमरा : वाहतूक नियमांचे उल्लंघन करणाऱ्यांविरोधात जिल्हा वाहतूक शाखेने कारवाईची मोहीम सुरू केली आहे. यात २१ जुलै रोजी नियमांचे उल्लंघन करण्यासोबतच कागदपत्रे न ठेवल्याप्रकरणी २८ वाहनांवर दंडात्मक कारवाई करण्यात आली.
------
बाभूळगाव परिसरात उघड्यावर शौचवारी
वाशिम : दगड उमरा येथून जवळच असलेल्या बाभूळगाव परिसरात गेल्या काही दिवसांपासून उघड्यावर शौचवारी होत असल्याने गाव परिसरात घाण पसरून ग्रामस्थांचे आरोग्य धोक्यात आले आहे. या प्रकाराकडे ग्रामपंचायत प्रशासनाचे दुर्लक्ष आहे.
-----------
घाणीमुळे डासांचा प्रादुर्भाव वाढला
वाशिम : मानोरा तालुक्यातील जिल्हा स्मार्ट ग्राम इंझोरी येथे काही दिवसांपासून घाणकचऱ्याचे प्रमाण वाढले आहे. त्यामुळे डासांचा प्रादुर्भाव वाढून ग्रामस्थांच्या आरोग्याला धोका निर्माण झाला असून, धूर फवारणीची मागणी होत आहे.